Независимое информационное агентство «ЦУМАДА.ру» rss tsumada.rutube.ru  rss новости 


Архив новостей , персон

Пятилеткаялдаса Eвропаялъул чемпион

М. Закаряев, Чонтаул росу ХIакъикъат №№110-113(17594-17597) 25 июнь 2009г.

Халкъазда гьоркьосеб классалъул спорталъул мастер, анкьцIул Дагъистаналъул, щуцIул Россиялъул чемпион, дунялалъул чемпионаталъул призер, Пятилетка росулъа 19 сон барав МусахIажиев Закария гъоркьиса вахъана кикбоксингалъул рахъалъ Европаялъул чемпион лъун.

Мусагаджиев Закарья . Мусагаджиев Закарья .
id:100189038196

ЦIумада районалъул ТIинди росулъа МусахIажиев МусахIажил хъизамалъ гIумру гьабулеб буго Хасавюрт районалъул Пятилетка росулъ. МусахIажил кIиабилев вас Закарияв гьитIинаб къоялдасаго бокьулаан спорт: хасго гугари, бокс, футбол. Росулъ спортзал гьечIониги, спортивиял хIаязе ругьунлъизе ресал Закарияда ратулаан, кьерилалгун цадахъ гьев унаан батIибатIиял къецал тIоритIизе росдада аскIоб бугеб Сулахъ гIурул рагIалде. Пятилеткаялда аскIоб бугеб Акнада росулъеги хьвадулаан Закария тренировкабазде. Кикбоксингалъул рахъалъ Европаялъул чемпион, вацгIал АхIмадов Шамилил тIадкъаялда рекъон Закарияцаги байбихьана кикбоксингалъул тренировкабазде хьвадизе. Гьесул тренер ккола «Скорпион» клубалдаса Зайналбег Зайналбегов. Гьесул нухмалъиялда гъоркь тIадчIун хIалтIана тренировкабазда ва чанго къецалда бергьенлъи босана. Закариял бугеб тIадчIейги бихьун, Шамилица гьесда бичIчIизабуна мурадалде щвезе ккани гIемераб захIмат баччизе ва щибаб къоялъ кIвахIтун ругьунлъабаздеги хьвадун, жиндирго махщел камил гьабизе кколеблъи. Тренер хIисабалда гьеб кинабго гьес Закариядаса тIалабги гьабулаан. Амма Закария захIмалъабазе къуркьулев гIолилав гуро. Байбихьана гьес тIадчIун кикбоксингалъул балъголъаби лъазаризе. Гьелъул хIасилалги квешал ккечIо. 2005 соналда 60 кг цIайиялда тайбоксалъул къецазда Закария вахъана Дагъистаналъул чемпионлъун. Гьебго соналда гьес гIахьаллъи гьабуна Москваялда тайбоксалъул кубокалъе гIоло тIоритIарал къецазда ва чемпионлъун вахъана.

63 кг цIайиялда тайбоксалъул къецаздаги Закария вахъана Дагъистаналъул ва Россиялъул чемпионлъун. Рес щвана Тайландалъул шагьар Бангкокалда тIобитIулеб дунялалъул чемпионаталда гIахьаллъизе. Гьениб МусахIажиевасе щвана мазгарул медаль. 2007 соналда кикбоксингалъул рахъалъ Россиялъул чемпионаталдаги Закарияца ракIчIараб бергьенлъи босана.

2008 соналдаги 63 кг цIайиялда кикбоксингалъул рахъалъги тайбоксалъул рахъалъги Дагъистаналъул чемпионлъунги вахъун гьесие рес щвана Брянск шагьаралда тIобитIулеб кикбоксингалъул рахъалъ Россиялъул чемпионаталда гIахьаллъизе. Гьениб бергьенлъи щун хадуб гIахьаллъи гьабуна Португалиялда тIобитIараб Европаялъул чемпионаталда. Гьенир Закариял цIайиялда рукIана хIалбихьи бугел кикбоксерал. Амма жиндирго къуркьулареб хасияталъ ва бергьенлъиялде бугеб шавкъалъ гьев Европаялъул чемпионлъун вахъана.

ТIоцеве Закария бергьана Сербиялъул спортсменасдаса, бащдаб финалалда гьесда данде ккана Босния-Герцоговинаялъул кикбоксер. Финалалда гугарана Турциялдаса спортсменгун. Лъабаздаго тIад бергьенлъи босана Закарияца.

Закариял вацгIал, Чонтаулалда чIарав АхIмадов Шамил ккола кикбоксингалъул рахъалъ Европаялъул чемпион. Гьев кIиясулго вацгIал МухIамадов Шамилги ккола гьеб спорталъул рахъалъ дунялалъул, кIицIул Дагъистаналъул ва Европаялъул чемпион. Закариялги анищ буго дунялалъулго чемпионлъун вахъине. Мурад буго Закариял гьеб анищ тIубай.

Къецазде ине гIарцул рахъалъан гьесие кумек гьабула вацгIал АхIмадов Шамилицаги, Олимпиялъул чемпион Сайгид МуртазагIалиевасги.



© 1999—2013 Сайт культурно-исторического наследия цумадинцев
Техническое и финансовое обеспечение: Магомед ГАДЖИДИБИРОВ и др.         Автор — Магомедгусен ХАЛИЛУЛЛАЕВ
e-mail: director@torgvisor.ru   тел. 8-963-797-40-07 // CMS для этого проекта разработан компанией TorgVisor.Ru
Вариант для печати вернуться в начало сайта
Мнение редакции независимого информационного агентства ЦУМАДА.РУ может не совпадать с мнением авторов статей, которые несут ответственность за достоверность приводимых данных в своих публикациях. Опубликованные материалы могут содержать недостоверные данные. Все материалы данного сайта являются интеллектуальной собственностью их авторов, полная или частичная их перепечатка без разрешения редакции запрещена.