Жакъа къватIий яхъун къокъана чанай
МугIрузул рохьазде хьулалги гьарун.
Ячана хивалаз мугIрузул тIогьий
Дуца хIетIе чIараб доб тIалъиялде.

ЧIалгIеналъул нухаз ячун унаго,
РекIелъ гуллаги щун йортана гIодой.
Тохлъукье дандчIварав рохьил чанахъан
ЧIегIерал дур бераз ракI дир лъукъана.

Чанай къокъулаго щай дун ургъичIей
Дир рекIел чанахъан мугIрузда вугин..
РакIалъ кин бицичIеб дур берзул махщел
Чанахъанас гIадин гулла речIчIулин.

БухIараб доб гулла дир рекIелъ щвараб
Бидул хIориние дун рехун тараб.
РекIел ахIиялъул гьаракь къотIараб
Дол дур берзул чIорал дир рекIелъ щварал.