Ахир заманаялъул цIумур кьабулеб буго,
Ахиралда щун гIасру, гIасилъун гIалам буго.
Нилъ киналго кантIизе хIикматал тIатун руго,
ХIакъаб нухда хьвадизе тIалаб гьабулеб гьечIо.

Хвезе рижун ругилан ракIазда хиял гьечIо
Бусурман аби гуреб кIудияб динго гьечIо.
ЩайтIаналда къвал жемун къоял тIамулел руго
Дунялалъул нигIматаз ахират кIочон буго.

Капурал пасикъазул гIадатазда хадур ун
БидгIиял жал гьуинлъун игIтикъад рекIелъ гьечIо.
ХIалалаб хIарамалъул кIвар гьабулел гIадамал
ЦIакъ къанагIат гурони данде чIвалелго гьечIо.

КIудиязул адаб тей гIагарлъигун кьал ахIи
Кьвагьи, гъванки, чи чIвайи гIадатлъун билълъун буго.
Эбел-инсуда данде гьаби гIадин хIапдолел
РекIелъ иман тIагIарал лъимал рахъулел руго.

Лебалал имамазул ирсилазул яцгин яс
Бащдаб черхги цебе лъун къватIал тирулел руго.
Саяхълъи берцин бихьун, мунагь букIин лъаниги
Гьезда тIадеги рекъон эбел-эменги руго.

Руччабазул зурмихъе бихьинал кьурдулеб куц
Рос вугин аби гуреб хутIараб жого бугищ?
Рокъоб щибаб жоялъул бетIергьанасда цебе
Жаваб кьезесев пакъир, ургъун щай вахъунарев?

Мискин-пакъирзабазе, закагIат-сахI кьечIого
Хъалаби ралел руго цоцалъ къецендилаго
ГIаракъи, кечI, кьурдигун, рихьдае кутак гьабун
Бертин зухIмат гьабула хIарамаб къагIидагун.

Бусурманаз гIунцIулел саунабазул кутак,
Зинадул кIалгIа гурищ, кIудияб мунагь гьечIищ?
Шамилил низам анищ, шаргIалде нуж ахIизе,
ШаргIалъул гIадлу анищ нужой диван къотIизе!

Бусурманчи гуккизе, гьесул чанта хIулизе
Ургъараб макру гурищ казино-автоматал?
Дур диналъул вацасул ракI бекун щвараб боцIи
Ахираталъул рокъоб гIазаблъун батиларищ?

Наркотиказул гьудул, щайтIаналъул яргъилав,
Ягьудиязул чанта бечед гьабулев гъарим,
ЖужахIалъул тIиналде тIепизейищ бокьараб,
Квешаб пиша рехун тун, гIодов щай вуссунарев?

РорчIулареб гудракье ккела гьудул нилъ хехго
Халатаб сапар буго ахираталъул нухда.
БецIаб ракьул чохьонир кинандай нилъ рукIина,
Нукир-накирзабазе кIвеладай жаваб кьезе?

ГIизраил малаикас дуде сапар бухьиндал
КватIун ккела хехлъе мун тавбу гьабун кантIизе.
Аллагь, Авараг кIочон хьвадулел гIадамазе
Къиямасеб къоялда гIазаб кутакаб буго!

Метерисеб къоялде нилъ чIаго хутIиялъе
БетIергьанасул кагъат щварав щивниги гьечIо.
Огь! Байтулман дуниял дудасан гьечIеб пайда
ЩайтIан, напсалъги гуккун мунагьал цIикIкIи гуреб.

Бусурманав чиясе мисал МухIаммад (с.т.гI.в) вуго
Гьесул нухги баянаб зодоб бакъгIан гвангъараб
Аллагьасде гIагарлъи гьесдасан гуреб гьечIо
РакI гIодун салат битIе Бичасул ТIагьаясде.

МухIаммад Илчи вуго хIакъав авараг вуго.
Гьесие мутIигIлъизе нилъеда тIадаб буго
Гьес нахъ чIвараб нахъе чIван малъаралда нахъ рилълъун
БетIергьанасе лагълъи гьабизе тавфикъ кьеги!

Дунги бищун загIипав мунагьал гIемерав лагъ
Аллагьасукьан хIинкъун ракI-ракIалъ тавбу гьабун
РахIмуялъул БетIергьан гурхIилилан хьул лъурав.
Нужодаги гьарула дийги дугIа гьабеян!