Дун пашман вихьани гIайиб гьабуге
ГIумруялъ бохичIеб бугин дир гьаб ракI.
Пашманаб гIумруялъ гIорал чвахараб
Бугин рекIелъ унти дадахъ урхъараб.

Дун гьитIин вукIаго рагъде къокъарав
ТIокIалъ тIад вуссичIев хирияв эмен,
Гьаб ракълие гIоло гIумру бичарав
Хирияв дадахъе урхъун вуго дун.

Эменан абизе аскIов хутIичIев
Дадаян ахIула дир гьинал ракIалъ,
Къимат дир цIикIкIизе къадру борхизе
Къойилго цIехола мун кив вугеван.

Дунгун гIел бащадал гIолил васаца
Дадаян абидал унтула дир ракI.
Пикрабазде вуссун гьабула хIисаб,
Дир хирияв эмен кивдай вугеван.

Каранда кверги лъун гьедулев вуго,
Эмен мун цIехелин дир рухI букIаго,
Дун божулев гьечIо мун чIванин абун,
Жеги дир пикрабалъ чIаго вуго мун.


ЧIалгIеналъ басулеб буго дир керен,
ХутIула пикрабалъ эмен цо вугин.
Цогидав восизе дир хIал гIоларев,
Дир эмен кив арав лъица бицилеб?

Лъил каранде вуссун ургъел бикьилеб,
Лъидехун вуссилев къварилъи щвани.
ГIумруялъул къоял бакIлъун ругин дий
Къо ккани лъихъ инев кумек гьаризе.