Жакъа багIар бакъги бухIун щун бугин,
Щай хасалил къоял ракIалде щолел?
Хъилил къватIаздаги хъаличин гьечIин,
Гьал дун унел нухал щай кIкIержадулел?

Жакъа гIазу гуро гIадалтIе балеб,
ГIодой гъунеб буго сон букIараб тIегь.
ТIеренаб цIер гуро нухазда бугеб,
ГъотIол хIули буго - сон букIараб тIегь.

Гьале цо кIудада данде вачIунев,
Гьавги гурищ вугев сон вукIарав вас.
Доле цо кIодоги хадуйго гъолей,
Дойги гурищ йигей сон йикIарай яс?

ГъотIодаса тIугьдул гъунарел анищ!
Нилъер гIолохъанлъи унареб анищ!