Дир гьудул ГIазизовас
ГIидалъул къо баркана —
Бархъалисес бежараб
«ЩагIил гIадам» бачIана.
Гьесул «гьав сайигъатас»
Гъапулав дун вигьана —
Гьанал гIадам вижараб
ГIаламат цебе чIана.

Я дир кIудияв Аллагь,
Унгоха, дур хIалкIолъи,
ХIайваналлъун течIого
Тун ругин гIадамаллъун,

МухIаммад расулуллагь,
Нижее дур вуголъи, –
Дулъго свине течIого,
Суннат лъунин диналъул.

Исламалъе гIассияб
МагIбуд гуро, дир гьудул,
Дуца дие бачIараб
ЧIагояб магIна буго;
Инсанасул сабруяб
Сунареб пашманлъидул
Щибаб ахIи бищараб
«Ургъалил сурат» буго.

Вай, дир «ургъалил сурат»,
Гъаримлъиялъул сурат,
Гъваридал пикрабазул
Паналъиялъул сурат.
Дур хIал бицунеб сурат,
Дир хIал какулеб сурат,
Киналго гIадамазул
ГIажизлъиялъул сурат.

Дир ургъалил гъванлъутIа
ТIад лъун тезе рекъараб
Къираласул таж гIадаб
ГIаламат якъинлъула.
Къванщикь чIвараб квералтIа
ТIалу гIадин бегараб
Гургинаб дунял гIадаб
ГIаданиб ургъел лъала.

Аллагьас кьураб гьунар
Гьукъизе бегьунгутIи
Бихьулеб щагIил кечIлъун
Кидаго батила гьаб.

ГIакълу–лъаялъул гьунар
Бахчун бажарунгутIи
БичIчIулеб цо сипатлъун
Соназе хутIила гьаб.