Аллагьасда аскIобги алжаналде нух лъолеб,
ЛъикIлъабазул бищунго берцинаблъун рикIкIунеб,
ГIадамазда гьоркьобги гьуинлъи тIибитIулеб
ТIокIаб рахъ — сахавалъи, сурун лъида бихьилеб.

Ханзабазда батичIеб, бечедазда бичIчIичIеб,
Базаргабазда лъачIеб, лъикIаз гуреб босичIеб,
ЧIаголъи тараб кьечIеб, кьурасе гуреб щвечIеб
Щулалъи — сахавалъи лъица реццалъе кквечIеб.

ГIумруялъ ресукълъарал мискиназе батараб,
Сапаралда дагьлъарав пакъирасда дандчIвараб,
Дуниялго бигъарав гъаримасе хIал кьураб
ЯхI гурищ сахавалъи, аварагас беццараб.

Сахавалъи гIадаб кечI гIиндаги кIутIиларо,
ТIехь хъвалезда гIадин гьеб гьуинги бичIчIиларо.