Эхеде балагье — гIазулал мугIрул.
ГIодоре балагье — гIурччинал хурдул.
Зодил цIваби руго ЦIумада гIурухъ
Полпил карачелалълъ чвердезе рачIун.

Чарамул сиязе макьу течIого,
Тобот кьурабалъан буго чвахулеб.
Кьижараб росдада бецIаб сардица
Бан буго жиндирго чIегIераб юргъан.

Ниж мугIрул ахада, гIурул рагIалда,
Чуял гIурде риччан, гIодор рукIана.
ГIолохъанай ясалъ тIубан сордоялъ
ТIамур кIутIун нижей кучIдул ахIана.

Огь, кинаб недегьлъи, кинаб гьуинлъи,
Кинаб пасахIалъи гьезулъ букIараб!
Кинаб рекIел гIищкъу, кинаб пашманлъи
КочIол бакъаналъулъ дида рагIараб!

МагIарулаз балъго гьабулеб рокьи
Панаял сариназ рагьун бицана,
Хераз квер хIанчIана «гIолохъанлъиян».
ГIолилал ахIдана «воре, босеян!»

ГIантаб моцI букIана, гьеб бичIичIого,
ГанчIазда тIад кунчIун зодихъ лъеделеб.
Ва ургъел гьечIеб гIор гIодоб чIечIого,
Чвахулеб букIана рикIкIаде эхей.

Ригь арав лълъарахъан хъабаги босун,
Нижер стакаби цIолев вукIана.
ЦIвабзазул сардилгун кьер цояб чагъир
«Босе, гьекъейилан!» — тIолев вукIана.

Ниж, гьекъечIониги ясалъул кучIдуз,
Киналго церего мехтун рукIана.
Ва дида кколаан, дун кьурабалъан
Йокьулелда хадув харулев вугин.

Хиялал рукIана гьале гьабсагIат
Ясгун данде чIвалин, гьей данде къалин.
Ва дуниялалда гьел лахIзатазда
Дидаса талихIав щивго вукIинчIо.

КучIдузулъ ахIана гъотIол ахада
Гъал чIегIерай ясгун рогьараб сардил.
МугIрузул чан гIадин, чода цее лъун,
Йокьулей гIолилас хъамун иналъул.

КучIдузулъ ахIана кIиго тIегьалъул,
Цоцаде щапулеб, данде щолареб
КучIдузулъ ахIана кIиго гIищкъудал,
Цоцазухь гьалдолеб, данде кколареб.

…КIочонареб сордо, сурмиял накIкIал,
Сверухъ гIенеккун чIун гIазизал мугIрул;
Нахъасан балагьун ЦIумада росо,
ГIоралъ росун унел ясалъул кучIдул.

ЛъачIо нижеда цIад щенолеб букIин,
ЛъачIо хъахIлъи кинан рехарабали.
Рогьиндал кьолона кьариял чуял,
Кьурул нухаздасан руссана нахъе...

Гьанже шагьаралда гьерсаца, къецаз
Кьварид гьавуравго, ракI сукIарабго,
РакIалде бачIуна ЦIумада гIорухъ
ГIолохъанай ясалъ ахIарал кучIдул.

Гьелъ керен чучула, черх цIилъун уна,
ЦIвабзахъе воржунев гIадин лъугьуна.
Ва борхалъудасан велъанхъула дун
Мурадал гIисинал гьерсихъабазда.

Дунялалъул лъикIлъи гьайбатлъи, гьудул,
Гьениб бугебщинаб берцинлъи, гьудул,
Гьеб бихьуларезда, бичIчIуларезда,
Валагьги, билагьги барахщула ракI.