Эмен мун хвараб къо, гьале жакъа къо
Къо анаг1ан вуго мун дие камун.
Гьаб нилъер рукъалъул к1удияб хъизан
Цо г1адин бук1ана дуца данд бачун.


Огь, бук1араб бигьа мун вугев мехалъ
Рукъалъул ихтияр цо духъ бук1идал.
Щибаб лъимералъе буюрухъги кьун
Мун т1ад вуссиналде т1убалеб мехалъ.

Огь бук1араб рохел мун вугев мехалъ
Щибаб рузман сордо духъе рессунел.
Х1алимай эбелалъ хинк1азде ах1ун,
Г1акълаби ниже дуца кьолелъул.

Г1едег1ана эмен мун ват1алъизе
Рат1алъана нижги, мун ват1алъигун.
Дур зонное салам кьезе рач1идал,
Кье буюрухъ дада, цолъеян абун.

* * *
Дун дирго т1убач1еб рек1ел мурадгун
Пикрабазул къорилъ къваридго йиго.
Байбихьи берцинаб, нуха хут1араб
Маргьу г1адаб рокьул ургъалилъ йиго.

Макьилъ алжаналда дун йигей г1адин
Алжанул берцинлъи бихьараб г1адин.
Бук1ана цо лах1зат дир г1умруялъул,
Йокьулин дие мун гьедараб къоялъ.

Дун йокьич1онани мунагь батулин
Дун жийго танани жужах1 бук1унин
Дур к1ут1буз шурулел гьел раг1абазда
Дунги г1енекана талих1айин кун.

Амма мун бихьинчи дуе баркала
Дун асир гьайизе къуват г1уралъухъ.
Бакъул гьумералда т1угьдул киниги
Духъ балагьун тезе х1ал дур к1варалъухъ.