ТIадгьаквари гьоркьохъеб школа лъугIарав цогиги гIолилас гIелмуялъул цо хасаб борхалъи квегьана. Рамазан МуртазагIалиев аспирантураялда цIалулев вугилан дица хъваралдасан инчIо кIиго сон. Ва гьаб соналъул 27 июналда РАНалъул член-корреспондент М-Р. МухIамадовасул гIелмияб нухмалъиялда гьоркь Рамазаница "Влияние выпаса на продуктивность и структуру растительности пастбищных экосистем Дагестана" абураб темаялда цIунана биологиялъул гIелмабазул кандидатлъиялде диссертация. Абизе ккола Р.МуртазагIалиев гIемер щванин нилъер районалъул мугIрузде батIи-батIиял гIалимзабазул къокъабигун, гьез чанги хIехьезе кканин тIабигIиял нилъер мугIрузда дандчIвалел захIмалъабиян. ГьабсагIат 26 сон гIумруялъул бугев гьев гIолилав рикIкIуна республикаялда бищунго лъай бугел гIалимзабазул кьерда къадруяв бакI кколев ботаниклъун. ХI. МухIамадовасул, ГI-ХI. ГIабдулаевасул, М. ГIабдулхабировасул, П. ХIабибовасул, А. ИсмагIиловасул ва цогидалги Гьаквариса гIалимзабазул мисал босарав Р. МуртазагIалиевасул бергьенлъиялдаса рохарал ва чIухIарал руго ТIадгьаквари росдал гьоркьохъеб школалъул коллективги, гьесул эбел, нилъер районалъул роддомалъул медсестра Марьямги, эмен ГIалибегги, тIолго гIагарлъиги, росдал халкъги.

Дун божула Рамазаница жегиги гIелмуялъулъ бергьенлъаби росизе рукIиналда. Гьарула гьесие икъбал ва цIи-цIиял гIелмиял рорхалъаби квегъизе тавакал.

Ратила жегиги аспирантурабазда цIалулел нилъер районцоял. Вуго нижехъаги Акнада гьоркьохъеб школа ЛъугIарав Мурад Нуцалхановги Санкт-Петербургалда. РакIалде ккола гьесул хIакъалъулъги нилъеда лъикIаб хабар рагIилин...