БахIарчилъи гучаб Эчеда росулъ
Къади герой вахъин гьечIо тамаша.
Лъабго районалъул цогояв герой
ГурхIундай чIухIулел ниж Къадидаса.

Немцазул танкаби малакь мерхьарав,
Дур къвакIи бихьана тушманзабазда.
Танкаялде вахун кьурди гьабурав,
Кьвари дур бихьана офицеразда.

Рагъда чIел босарав Эчедаса вас,
Дудаса чIухIарал ниж цIумадисел.
КъвакIарав Къадил цIар дагъистанияз,
ЦIунун буго рекIелъ гьев хун хадубги.

Берлиналда тIадги бергьенлъи босун,
Мун росулъ вуссараб сон кIоченаро.
Керен медалаз цIун, багIараб цIвагун,
Росдаца гьабуна мунгун дандечIвай.

Умумул къвакIарал, къуркьи лъаларел,
Къуватаб наслудал къвакIараб гъалбацI.
Тухум-кьибил тIокIав тIадмагIарулав,
КIочон мун теларо росуцоязда.

Санайил дур зонохъ тIугьдулги росун,
Уна цIалдохъаби дур хоб бихьизе.
Рузман сордоялъул адабги цIунун,
ЧIахIиялги уна зияраталъе.

Ункъоялда анцIго сон тIубаялъул,
Юбилеялда бан гьабуна шигIру.
Эбелалъул вацгIал, инсулги цингIал
Мун кIочон теларо абадиялъго.