КIикъоялда анцIго дир гIумруялъул
ГIадалнах гьалулеб унтиго киса?
ЧIегIераб ботIрол рас хъахIлъараб мехалъ
Диде тIад бачIараб балагьго кинаб?
Дой чидар ясалъул чалухълъийищ гьеб?
Долъул гьумералъул берцинлъийищ гьеб?
Яги долъул кIалалъ дие щурулел
Гьуинал рагIабаз гIадаллъунищ дун?
Гуро гIолохъаби гьаб буго балай
Бищун ахиралде аскIоб бачIулеб
Гьаб буго доб рокьи рукьбал риулеб
РекIелъ къвакIи бугел къуркьизабулеб
Гьаб буго доб унти дий ахиралде
Аваданай ясалъ сайгъат гьабураб
Гьаб буго доб балагь дие йокьулелъ
Бащдаб жиндийги тун дихъе бегьараб.