Независимое информационное агентство «ЦУМАДА.ру» rss tsumada.rutube.ru  rss новости 


Архив новостей , персон

Назад

Депутатазул бахIс

ТIОЦЕВЕСЕВ
Дида тIад къан буго избирателаз
Шагьранух бахъине ункъракьалдехун,
Ункъого соналда лъилго хIал кIвечIеб
ГIумруялъул суал тIубазабизе.
Хушетибе нух щвей щуго къодул иш
Нуж хIадурлъун рукIа дий гьаракь кьурал.

Ноябрь моцIалъул ахир щвелелде
Щивав чияс босе цIияб машина.
РорчIа макьидаса, гIелин кьижарал
ХIадур гьабе квен–тIех, хъве кIудияб оц,
Эхедемухъалъул анищ тIубараб
Байрам гIагарлъанин, гIедегIе гьенир.
КIИАБИЛЕВ
Дуца дурго тIадкъай тIубан хадуса
КIиго къо инелде тIубала дирги,
ГIазу–цIад бан хадуб нухал къачIай щай
Вертолет рещтIина Метрада росулъ.
Гьебги гIечIонани гIагарлъи бачун
Маххул нух бахъила Метрада гьоркье.
Нагагь къаси–къаси хьвадизе ккани
Чирахъал ракила кинабго нухда.
ЛЪАБАБИЛЕВ
Дие кьураб тIадкъай гьадингосеб жо
Регьаги цIунизе нухги къачIазе.
Нухалги нужеца къачIан ругелъул
Дирги гъулбас лъела нужеда гьоркьоб.

Регьа цIунизеги цо охран тела
Нилъеца малъухъе хьвадизе лъалев.
Автобус– поездал рехе унелъул
Регьадул нахърател бехе битIулев.

Бехе базаралда контейнер лъела
Нилъей щвараб давла бича–хисизе,
Даран гьабун щвараб баркатаб гIарац
Росдал хIажалъаби тIуразе кьела,

Метрада боржунеб цIакъаб вертолет
Инхокъварибеги рещтIинабила
Рехе гIедегIарал унтарал–щокъал
ГIарац бахъичIого рехе ритIила.
УНКЪАБИЛЕВ
Нужер гьунаразухъ лъикIги гIенеккун
Дирги хIукму ккана рагIи абизе,
Нужер гIадаб хъулухъ гьечIонаниги
ГIемер пударизе ккаравин дунги.
Нужеца тIадкъаял тIуран хадуса
Лъабго къоялъ дица бертин гьабила.
ТIолабго ХъварщикIкIал гьенибги ахIун
Кумисгун хIанчIил рахь гьекъезе кьела.
МугIрул тIалъиялда бугебщинаб чан
Гулликьеги бачун бегизабила,
Рорхатал мугIрузул даруял хурдул
Дандеги ракIарун ракъвазарила.
Боржунеб вертолет, унел поездал
Хьвадулеб автобус, гьечIеб къварилъи
Эхедемухъалъул тIолго бечелъи
Оптовый рынказда бичизе лъела.
ЩУАБИЛЕВ
Щивасе салам кьун щварал рищиял
ЩвечIого хутIичIо гъутабаздеги,
ГIарац гIемерлъана, дагIба цIикIкIкана
Кьалда бергьенлъи щун дий мандат щвана.

Дица гьарунщинал лъикIал хIалтIаби
РикIкIун хIал кIвеларо, хIисаб–счет гьечIо,
ГьабсагIаталъги дун гIодов чIун гуро
Шаваялъул шагьар гьабулев вуго.

Колхозал риххана, ниж цIакъ рохана
Рохалил цIадал ран боцIи тIагIана,
ТIощалил хурзабахъ чIахI–къул бижана
ТIолабго бечелъи бича–хисана.

Жалго бетIергьанаб боцIол гIемерлъи
Гьеб боцIоца кьолеб рахьдал гьарзалъи,
Гьан–хIан бичулаго бугеб захIмалъи
Щвараб хайир лъезе хутIун гьечIеб бакI.

Шаваялда ругел школа–медпунктал
Лазерный техника –гьеб лъил бажари,
Лъица гьукъун бугеб нилъер хIукумат
Дир каранда цIвагун медалал разе.

Сессиязде ине бугеб захIмалъи
ТIолабго Шаваялъ регIананиги,
Сапар бухьинчIого гьечIеб дие рес
ТIолго Шаваялъул вакиллъидал дун.

Киве щвананиги кIочон теларо
Дун тIогьив регIараб гIагараб Шава,
Нужер гьари –мурад тIубачIин абун
Дида гIайиб чIваге, дий долго щванин.

АНЛЪАБИЛЕВ
Депутатлъун вищанин,
Гьанже халкъ дий щибизе
Хъулухъ кIудияб щванин,
Рокъоб шагьи цIикIкIанин,
Халкъалъул тIадкъай тIубай–
Гьеб гьадингосеб рагIи
Гьеб тIубазе тIад тарал
Бегавулзаби ругин.
Росу бикь – бикьи гуреб
Гьанже дир мурад гьечIо,
Цоял хIалтIуда лъела
Цоял нахъе рахъила,
РагIи билълъанхъарабгIан
ЖахIда гIемер бекьила
БукIарабги гьуинлъи
Гьоркьоб хвезе гьабила.
Сессиябазде ина
Бокьухъе гьаракь кьела,
Амма квер борхилелде
Чантил хIисаб гьабила,
Депутатасул тIагIам
Гьанже гурищ дий лъараб
ТIасиял рищиязда
ТIажу кьунцин босила.

СПИКЕР
Депутаталги кIалъан спикер вуцIцIун данде ккечIо
Спикерасулги буго гIемер гIакъуба захIмат,
Депутатал ахIизе цереккун ургъичIони,
Вертолетги балагьун, къватIир рахъине кола.

Руго гьел шагьаразда, руго гьел гъутабазда
Руго гьел кулабазда, руго гьел курортазда,
Гьел гьечIеб бакI дагь буго Россиялъул ракьалда
ЦIехезе захIмат буго цадахъ лъугьичIонани.

РачIа цадахъ рукIинин гIагараб гьаб ЦIумада
ЦIумазул ватIаналъе гьарзаяб бачIин щвезе,
РачIа гъункун рукIинин, рачIа цолъун хIалтIилин
ГIагараб нилъер район тIегьан цебехун ине.

РачIа пикру дандбазин, рачIа гIакълудандбазин,
Гьедин гьабичIонани, цIумал гъудул лъугьунин,
РачIа гIакъилго чIезин, вацал гIадин рукIинин
Гьедин рукIинчIонани, хвараз нагIана кьолин.

ГIакъилаб цебе баче, ццидалаб нахъе рехе
Ццин цебе ккезабиялъ кьал гуреб жо бекьичIин,
Халкъалъ цIар чIван бугелъул, божилъи ритIухъ гьабе,
ГьабичIони ункъо сон хехго боржун унебин.
Назад


© 1999—2013 Сайт культурно-исторического наследия цумадинцев
Техническое и финансовое обеспечение: Магомед ГАДЖИДИБИРОВ и др.         Автор — Магомедгусен ХАЛИЛУЛЛАЕВ
e-mail: director@torgvisor.ru   тел. 8-963-797-40-07 // CMS для этого проекта разработан компанией TorgVisor.Ru
Вариант для печати вернуться в начало сайта
Мнение редакции независимого информационного агентства ЦУМАДА.РУ может не совпадать с мнением авторов статей, которые несут ответственность за достоверность приводимых данных в своих публикациях. Опубликованные материалы могут содержать недостоверные данные. Все материалы данного сайта являются интеллектуальной собственностью их авторов, полная или частичная их перепечатка без разрешения редакции запрещена.