МугIрул тун гочарал дир магIарулал,
ГIатIидаб ракьалда рещтIарал цIумал,
Щиб хIалалда ругел, диналъул вацал,
Ракъарал, къечарал гIемерал ругищ?
Къварилъи, гIатIилъи, сахлъи кин бугеб?
Лъималаз малъараб босулеб бугищ?
Яги буюрухъал гьезулищ ругел?
КIудиязул адаб рехун тун бугищ?
Щулияб гьудуллъи щущахъ инчIого,
Жеги цIунун бугищ магIарулаца?
Яги тушбабазда сверунищ ругел,
ЯхI-намус, гIаданлъи гIарцухъ кьурабищ?
Какил мацI кIочанищ, кIал кколеб бугищ?
Байтулман дунялалъ гуккулел гьечIищ?
Аллагь кIочон тараб бечелъи щванищ?
Мискин-пакъиразе садакъа кьолищ?
Даран-базаралда разиял ругищ?
Ресторан-тукаби дозухъ ратила,
Вокзал-базаргIаги нужее щвечIищ,
БетIербахъиялъе даран гьабизе?
Тамахал бакIазда, хинал рукъзабахъ,
Ханзаби гIадинан щал ругел гьанже?
Хъулби гIадал рукъзал нужеца ранищ,
Яги петеразда рещтIунищ ругел?
КигIаналъ рагIдукь нуж хутIизе ругел,
Харбал лъикIал гьечIин гьанир рагIулел?
Гьел нужер бохдузда михирищ бараб,
ТIаде вахунев чи вихьулев гьечIин,
ГIекколеб тIохалъул тIалаб гьабизе,
ГIатIидаб ракьалда къварид ратани,
Къокъа магIарухъе гIагаразухъе,
ГIарац хIажат гьечIин алжан бихьизе.