Улбузени васал щу-щуги кьола,
Мун дур эбелалъе цохIо вукIана.
Яцалазе вацал цо хвани цояв,
ВукIинчIо яцазе тIокIав вац нахъе.

Киндай бахиллъичIев тушманлъи хьалев,
ТIогьол гIумруялде ишан босизе?
Эркенго боржунеб чармил гуллие,
Дур каранлъ гурони бусен щвечIебдай?

Лъалеб букIинчIебдай дов гъачагъасда,
Эбелгун яцазул мун цохIо вукIин?
Лъалеб букIинчIодай чармил гуллида,
Йокьулей ясалъе мун камулевлъи?

* * *
Гьудул йикIарайищ, рокьи букIанищ,
Ракьулъищ босараб кинабго цадахъ?
Анищазул гъамас гIолохъанлъиги,
Къанабиги тIад чIван къороллъаралищ?

Чармил гуллаги щун керен борлъидал,
Керен кьурай эбел цее тIамичIищ?
ХIилла-макру цIикIкIун гIодове ккедал,
ХIалае рахъине вацал ратичIищ?

Чохьол эбелалъул ракI бухIун лъурав,
РекIаги гьесда цIа ракI гъураб гIужалъ.
КъвакIарав дур инсул чара босарав,
БухIаги гьесул черх цIадул унтуца.

ГIолохъанлъи, гогьлъи, гIанчIаб замана,
ГIадада арасухъ турула керен.
Нахъе хутIулезул ургъел гьечIого,
Хабалъе арасухъ бухIула керен.