Независимое информационное агентство «ЦУМАДА.ру» rss tsumada.rutube.ru  rss новости 


Архив новостей , персон

Назад

Армиялдаса кагътал

Дир хирияб гагу, гургинаб гьумер,
Ургьиб ракI бакъвазе йихьинчIей анищ.
Духъ ккараб рокьуца гIамалги хисун,
Хасел тIамиларо тIегь баккизегIан.

Рокъой тарай дуде керенги чучун,
Кинниги баччила гьаб кIиябго сон.
Бакъ буссаралъубе бакъдебусс гIадин,
Жеги кIиго соналъ балагьун йикIа.

Унго ахикь гъотIол рагIдукьги рещтIун,
Къвалги бан бикьила букIараб рокьи.
Дуниял роцIцIиндал, цIихер баккидал,
Вуссина духъе дун тIегь гIадин ваккун.

* * *
Алжанул хIориниб чвердолеб микки,
Йилълъа дунгун цадахъ тIадмагIарухъе.
БацIица аги мун бецIаб сордоялъ,
Дир берцинаб рагIухъ гIинтIамичIони.

* * *
КIиго сонил сапар, халатаб сапар,
Къо-лъикI гьабун дица мун тараб заман.
Гьанже лъикI йикIаян квер босулелъул,
Гьурмада цо гьими беразда магIу.
Армиялдаса дун тIад вуссинегIан,
Балагьун чIелилан гьабураб къотIи.
МагIарул кучIдузул панаял бакънал,
ЗанкIун ясаз цIураб горвоенкомат.
ЗахIмат букIараб куц квер босулеб мех,
Дол хасалил сардал, ихдалил моцIал.
Духъ ккараб рокьуца макьу щоларел,
ГIенекке, дир гьудул, гьаваялъул хIинчI.
Дуда хадув хьвадун дир хьитал хванин,
Вегун макьу гьечIеб рокьул ургъелалъ.
Дир гIадаб гьалагаб ккогеги рокьи,
Рокьи ккарай гIадан, кьер берцинаб хIинчI,
ХIалалъ гуронани щвезе рес гьечIеб.
Берцинлъи бергьарай, берал чалухай,
Гьалула, бетула жаниб гьинал ракI.
Ва дур гьел хъахIилал берцинал берал,
Чи чIвалел жал руго рокьичIелани.
Лебалаб дур лага, тIадагьал хIатIал,
ТIаде хIур чIваларел чергес чакмаби.
Чиллаялъул гъалал, чIегIерал кьунсрул,
Кьезе барахщула дунял кьуниги.
КIутIбузул тамахлъи, гьурмал гургинлъи,
Черхалъул чергеслъи, гIамал-хасият.
Миллион кьуниги лъицадай кьола,
Гьимун, елъун дуца бицунеб калам,
Кидаго ахIулел рокьул жугьаби.
Жанисанги нахул, тIасанги квасул,
Квер дуда хъванадай гIолохъанчияс.
Жеги кIиго соналъ балагьун чIезе,
ЗахIматаб жо гуро яхI гьабунани.
РечIчIараб чIор гIадин дун вачIинегIан,
Балагьун чIелилан ракI чIараб буго.

ЖужахIалъул цIаялъ вухIилин кола,
Дир рокьи ккарай яс чияе ани.
ЖужахIалъул цIадав вукIаниго лъикI,
РекIел милъирщоялъ цойги вищани.

Гьанже духъе кьела ручкагун тетрадь,
Рокьул гIарзаялъе жавабал хъвазе.
Хъван почалда лъела меседил конверт,
Камилаб рокьуе мун кантIиледухъ.

Кинабго Дагъистан дие кьуниги,
Кьеларо, хирияй, дур берзул канлъи.
Гьадин дун квегъани хIакъ букIина дуй,
Гьабиларищ дару дун сах гьавулеб?

* * *
Анкьабго дур кьибил разилъичIони,
Дир рокьул къуваталъ кьурун яхъила.
Рокьиялда гьоркьоб кьал гьабунщинал,
ГIоралъ рачун аги ралъдал тIиналде.
Зазил хъарахъалда пихъ бижаниги,
Теларо, хирияй, духъ ккараб рокьи.
ХъахIилаб зодисан ицц бакканиги,
Руссинаро берал духъ ралагьарал.
Назад


© 1999—2013 Сайт культурно-исторического наследия цумадинцев
Техническое и финансовое обеспечение: Магомед ГАДЖИДИБИРОВ и др.         Автор — Магомедгусен ХАЛИЛУЛЛАЕВ
e-mail: director@torgvisor.ru   тел. 8-963-797-40-07 // CMS для этого проекта разработан компанией TorgVisor.Ru
Вариант для печати вернуться в начало сайта
Мнение редакции независимого информационного агентства ЦУМАДА.РУ может не совпадать с мнением авторов статей, которые несут ответственность за достоверность приводимых данных в своих публикациях. Опубликованные материалы могут содержать недостоверные данные. Все материалы данного сайта являются интеллектуальной собственностью их авторов, полная или частичная их перепечатка без разрешения редакции запрещена.