МугIрул гIанабалъан магIу бецIцIулеб,
ЦIорорал иццазда хинлъи рехулеб,
Хехдарун гIоразул гIамал хисулеб,
Их бачIунеб буго, чIалгIун гьечIищ мун?

МугIруз хъахIал тIингъал тIаса рехулеб,
ТIабигIат хисулеб, гьава цIилъулеб,
Гьурмаде гьайбатаб гьими рехулеб,
Их бачIунеб буго, чIалгIун гьечIищ мун?

Гьава басандулеб, гьури кьурдулеб,
Кьурабалъ кучIдузул гьаракь багъулеб,
Гьинал ракIалъ балъго къали бухулеб,
Их бачIунеб буго, чIалгIун гьечIищ мун?

Макьидаса тIуркIун тIугьдул рорчIулеб,
ТIогьода рещтIунеб щуб гьарзалъулеб,
Щобазда хIеренго хьухьал хурхунеб,
Их бачIунеб буго, чIалгIун гьечIищ мун?

Ракьул гьури пулеб, черх гьелегьунеб,
Гьаваялде хехал пикраби унеб,
Наялъ гьоцIо кьолеб, тIегьалъ щуб цIалеб,
Их бачIунеб буго, чIалгIун гьечIищ мун?