Дур расалъул гур-гури,
Габуралъул халалъи,
Гъалазул дур кьур-кьури,
Кьунсрузул дур чIегIерлъи.

Дур мацIалъул бегIерлъи,
ГIанабазул багIарлъи,
ГIамалалъул гIадатлъи,
ГIакълуялъул камиллъи.

Дур кверазул хIеренлъи,
ХIатIазул дур гIедерлъи,
Дур беразул цIодорлъи,
ЦIаралъул дур берцинлъи.

Бабае дур хIажалъи,
Дадае дур хиралъи,
Хабаралъул гьуинлъи,
Гьумералъул гьайбатлъи.

ХIисабалъул бажари,
Букваралъул дуй бокьи,
Бокьараб махщел буго,
Щибдай дуца бищила?

ТIегьай абе дур гIумру,
Гьаб гьайбатаб ракьалда,
Йокьаги мун дий гIадин,
Дунял-гIаламалъего.

Бакъулал гурел чIорал,
ЧIвагеги дур гьурмада,
Гьими гуреб дур бадиб,
Бихьугеги кидаго.