Канлъи щайха ссунеб
Щибаб сордоялъ?
Сордойил хирияй
Хурхун гаргазе!

Гьале къо борчIана
ЦIалараб тIехьлъун,
ЦIидасан бецIлъана
Ссунеб чирахълъун.

Нилъеда къвал бана
Балъгоял сагIтаз.
Сасарал, хIеренал
Сардилал бакъназ.

Соролел квераца
Кверал квашана,
Анищал кIутIбузда
КIутIби ратана...

Рогьел хех гьабуна
РекIкIаб заманалъ,
Амма сарин хъвана
Хасаб сордоялъ
* * *
Мун батIалъулей йиго,
Бортун унеб цIва гIадин;
Берал дихъ руссун руго,
Барщараб цIибил гIадин.

Мун уней йиго дихъан
Хъамун берзул канлъигун,
Каранда ругъунги бан,
Берцинаб дир–тIегьги тIун...

ТIад юссун ячIарайго
Сородилел кIутIбуца,
КIиабизеги дие
ДугIа цIалулеб буго:

Мунгун цадахъ кIоларин,
Мун гьечIого гIоларин...
ГIазулъ лъун, цIадай рехун,
ЦIоб гьечIеб тамихI щай дий?