Рокъоб къварилъи бугищ,
Къаге нуцIа лъиего,
Дуда ракI бухIуларес
Рагьулареб гьеб къоялъ.

Рокъоб къварилъи бугищ,
Къварилъуге, къвакIун чIа,
Рекъел гьабе гьеб къоялъ
Дурго къисматалъулгун.

Къварилъи щвечIеб рокъой
ГIатIилъи щоларилан—
Аби бугин мугIрузда,
Божа гьелда, битIараб.

Рокъоб къварилъи бугищ,
Къаге бер гьеб къоялъе,
Божа, букIине буго
Рохалил къо хадубги.
Хинал бакъул чIораца
ЧIван рекIеда хIинкъигун,
Къиматаб талихIалъин
Балеб габуралда къвал.

Рокъоб къварилъи бугищ,
Къварилъуге, дир гьудул,
Дур горбода бугеб рукь
Балин гьудулас цадахъ.

* * *
Дир талихIалъул цIва
Ссун ине гьечIо
Гьаб дунялалда дуй
Къоял рукIаго.

БукIа абе къисмат
КьогIал хIаязда,
Кьела дуца дихъе
Урхъи ккараб квер.

Жакъа дуе гьечIо
Сундулъго ками,
Сверун дуда буго
ТалихIалъул нур.
Рокъоб хинлъи дуе—
Лъималазул кечI,
КамичIеб недегьлъи
Дуе росасул.

Амма дир пикрабалъ
Йиго мун дирлъун,
Дур талихIаб гIумру
Буго дий дирлъун.
Дур рохалил къоялъ
Каранда бахчун
Буго дир гIищкъудал
Балъгояб талихI.

Дир талихIалъул цIва
Ссун ине гьечIо,
Гьаб дунялалда дуй
Къоял рукIаго.