ГьитIинго вукIаго тIуна рекIел чIчIва,
РагIичIо ахIулеб сарин эбелалъ.
Свана дир беразе сардил канаб цIва,
БецIлъана даимаб бакъ гьеб лахIзаталъ.

Дир васин ахIулеб рагIичIо дида,
Хириявин абун бахъичIо тIад квер.
ЩвечIо дие талихI дур цIар ахIизе,
ЦIорораб ганчIида цIализе гуреб.

Амма ячIуна мун дихъе макьабалъ,
Бищунго хириял хивалазулъан,
Каранде къала дун дуде урхъарал,
Бищунго недегьал анищацаги.

Сонал сверанагIан, щибаб къо рикIкIун,
Камуна мун дие, хвана цIи гьаюн.
Лъимадул каранда, камурай эбел,
Гьанжеги ссудула дур васасул ракI.

РакI бухIулеб буго, рахIму гьечIого,
ХIасратал анищаз эбел абизе...
ЭБЕЛ—кигIан хинлъи гьеб каламалъулъ,
КигIанаб балъголъи дие гьеб рагIулъ.

Рагьун алжан буго каранда ракIалъ,
ТIолго руччабазе—тIолго улбузе.
Вуго бетIер къулун дун абадиялъ,
Ками гьечIеб нужер гьеб рокьиялъе.