Дур лачен чучанин чи вачIун вугин,
Чаранлъе рекIеда, нижер бахIарай
Багьадур къанщанин рогьел бачIанин,
Рачел щулаго къай тIулалъул яцал.

Росдал васал болъе унеб мехалда,
Дун чIухIун йикIана духъги ялагьун,
Рагъдаса русунел багьадуразулъ
Мунги вихьилилан хьулгун йикIана.

Хасало тIегь балеб Асада тIалде
ТIокIав ваккиларо Камалил Башир.
Кавказ къотIун араб къвекIаб цIудул тIинчI,
ТIокIаб боржинаро бабал рокъове.

Хваниги кIваричIо кIал хъубаб гъалбацI,
Гъара гьабуразда къоно тIамидал.
Къанщани щиб бугеб щобил багIарбакъ,
Гъачагъазул къавулъ магIирукъ лъедал.

Абурал русинчIел росдал мусудул,
Дир бахIарай нужгун–гьанжеялдаса.
МугIрул росабазул бесдалал улбул
Дунги нужер кьерда жакъаялдаса.