Гьаниб гъутIбузда тIегь
Баккулеб буго,
ТIад магIарухъ киндай
Дуниял бугеб?

ГIурабаз гIурччинаб
РетIел ретIанин,
ГIазу бианадай
Дир ватIаналда.

Жиндирго лъимадуй
Эбел кинигин,
ТIабигIаталъе бакъ
Буго гьимулеб.

Гьардараб рокьуде
Кьал ахIунчIарав,
ЧIухIарав дир эмен
РахIмулъичIодай.

Рокьуй нух къаразде
Икъбал гьечIилан,
Гьал мугIруз ахIилин
Хьул букIана дир.

Балаялда цебе
Сангар къаразде,
Къол сордо лъугьаян
Гьарула дица.

Инсул росо тола
ТалихI къараца.
Къурабдай дир талихI
Тарайдай гьелъ дун.

Дандияв швечIезул
Дуниял – бецIаб,
БецIабдай букIина
БахIараб гIумру.

Радал баккулаго
Бакъгун кIалъала,
БитIичIиш рогьелго
Дир гьудуласан.

Сардил чирах–моцIрой
БетIер къулула,
Гьудул кинан вугев
Бицеян гьарун.

Дун чIалгIунги йиго
ЕчIанги йиго,
Дир чIухIараб лачен
Дур щиб хIал бугеб?
Дун хIинкъунги йиго
Божунги йиго–
Йоржундай йорчIила
Йортундай ина?