Абусупян, салам–
Сахлъи дир мурад.
Огь, далай далалай
Дун кIочон таниш?
Халкъиял бакъназул
РитIукъав мурид,
Дидани кIоченчIо
Мунги пандурги.
Исанаги байрам
БачIунеб буго.
КучIдулги рукIина
Кепги букIина.
Кавказалъул мугIрул
ТIугьдуз къачIана.
Бакъналги рачина
РакIги чучила.
Нолъ дунго хутIана,
БухIаяб къавулъ,
Къваридав чучизе
Чиго гьечIого.
Доб дуца бачIараб
ЧIухIараб пандур,
Бисмилагьги гьабун,
Босана кодоб.
ТIатала бохги лъун,
Михъалги кьурун,
МахIмудлъун вукIана
БакIида гIодов.
ГIенекке, гIенекке
ГIагарал мугIрул
ГIарашил ГIумарил
Бакъан рагIизе.
Дуцаги гIин тIаме
Борхатаб Гъуниб,
Имам асирлъараб
Сарин бачанин.
ХIасратго кIутIана
ТIармида килшал.
Я гьаракь бахъинчIо
Я бакъан гьечIо.
Нахъеги хъинтIана
ТIармил чIвабзазда
ТIинкъанцин бахъичIо,
БуцIун чIана гьаб.
Вай, тамаша, хIикмат,
ХIалкIолев аллагь,
«Гьалда лъолеб цIар щиб
ЦIаларал чагIи:»
Меседил сапалги
ЦIан ругин гьалда,
Гьадил пандур щайха
СихI къотIун чIараб?
Халатаб гарбида
Пардавал ругин,
Дирго кверазул дай
Кашбу хун бугеб.
Гьеб мехалъ зобалаз
Абунин ккана:
–Анишазул чотIа
Щуго сон банин,
РештIа гьанжениги,
Рехизе гурин.
ХIатта лъимадацин
Лъалеб жо буго:
ХIорал къотIабаца
Бакънал кьоларо.