Мун йихьизейилан хьулгун рукIана,
Юхь-юхьун ячIана носилькаялда.
Дуда бер чIвазеян урхъун рукIарал,
Бахъулареб ретIел ретIун ячIана.

ЯчIинги берцинай, инги берцинай,
Гьединищ ячIуней нижеда тIаде?
Лугбалги чергесай, черхги узданай,
ХIедул чирахъ гIадин йиун тIагIарай.

Мун хунилан абун ниж божун гьечIо,
Унти гьоркьоб къотIун кьижун ятила.
Къанщанин абизе цIакъ захIмат буго,
Макьилъ батилилан тани гурони.

Дуего вокьарав, мунги йокьарав,
Гьудулги данде чIван чIухIун ятила.
Бицунелъуб тараб берцинаб хабар,
Гьанже бицинадай гIедегIичIого.

ГIисинал ясалги кIудиял гIунин,
КIудиял гIуралго жинцаги танин.
Гьанже мунги анищ гьезда бер чIвазе,
Дурго ясазулги лъимал рихьизе.

ТIогьолъго вухIарав, бахIарго хварав,
Халитил вас вихьун йохун ятила.
Гьанжеги гьевилан угьдулей йигей
Эбелалъул салам бицун батила.

Меседил зани чIвай гьелъул хабада,
Меседилъги тIерхьун нуж хьихьаралъул.
ГIарцул забор гьабе гьелъул хоб сверун,
Эмен хвараб лъазе гьелъ биччачIелъул.

Ихдалил тIегь бекье гьелъул хабада,
ТIегь гIадинай Багьжат лъураб бакI лъазе.
ЧIегIераб байрахъ чIвай больницаялда,
Байрахъ гIадай Багьжат камураб лъазе.

Агъвалир хьвадулел халатал нухал,
Мун гьоркьоса камун киндай хьвадилел?
Поликлиникалъул кабинетазда,
Ниж къварид ругеб куц мунги гьечIого.

Ниж цIоролел руго, ЦIоралъул бика,
ЦIорораб ракьулъе мун аралдаса.
Ниж гIодулел руго, Багьжат, мунилан,
Юссин гьечIеб сапар дуцаги гьабун.

КигIан гIоданиги, ахIи баниги,
Нахъе рачIунаро хварал гIадамал.
КигIан угьданиги, зигарданиги,
Зигарги гьаракьги кинха рагIилеб?

Чан гIолиласулха чиллайдул михъал,
ГIункIкIаца бусадуй росун ратилел.
Чан бахIаралъулха меседил гъалал,
ЧIегIераб ракьулъе турун ратилел.