ГIахьвахъ унеб кьодухъ дун рещтIарайго,
Гьаб нухлул гIатIилъи гIечIеб лъаларо,
Ясазда гьоркьосан бетIер сверарав,
Мотоциклист ана гьурилъун воржун.

Ясги кодой ячун чвахулеб бигун
ГIодулей дунги тун лъутана цIукIа.
Дун – чIужугIаданалъ чIвалин хIинкъундай,
Лъутарав хIалихьат кьо тун довехун?

ЧIегIераб гьеб тIагъур бихьиназ лъолеб,
Мун гIадиназда гьеб рекъолеб гьечIо.
Эбелалъухъе кье хинкIал рахъизе,
ХIинкъун лъутанщинахъ дуе кваназе.

Дун гурхIулей йиго дур эбелалда,
Гьединав хIалихьат гIезе гьавурай.
Дица законалде мун ахIиларо,
Аллагьасухъ тела хIукму къотIизе.