Эбел – гIумруялъго дур чорхол дару,
Эбел – гIумруялъго гIакълудал къулгIа,
Эбел, ичIго моцIалъ ваччарав дуца,
Эбел, дур хIеренлъи гьаб киниялъухъ.
Эбел, рагIи баба, гьеб тIоцебесеб,
Эбел, дунялалъул тIагIам дур къочи.
Эбел – каранзул ахI кьураб хвасарлъи,
Къварилъидул гъамас дун эбелалъе.

* * *
Хваразда чIагоял рихьулилан абула,
Хадув гIодулев тарав дуда вихьулищ, эбел?
Алжаналъул нигIматал гьуинлъулел ругодай
Ракьалда ракI къварилъун тарав дидаги гурхIун?

Кодов васги ккун уней гIадан данде чIванани,
Къала ургьиб гьинал ракI: гьай дир эбел гьечIодай?
Берцинаб дур гьимигун киниде къуларай мун
ЦIехолев хутIанин дун, хирияй, гIумруялъго.

* * *
Дунялго гвангъараб зобил багIарбакъ,
Щай пашманго йигей, пашманго дун тун?
Къаси цIураб моцIлъун гвангъизайила
Бищунго йокьулин гIиндеги щурун.

Цоцахъе щвечIони мун тIаса лъугьа,
Бакъулгицин хинлъи дие рагьарай.
Къиямасеб къоялъ данделъи хIакъаб,
Алжанул нигIматлъун дуда ватила.