Анкьго къираласде, падишагьасде,
Пачаясул асир дов Шамилиде,
ГIарабустаналде, Гьиндустаналде,
Мисри-Шам хьихьарал пачазабазде,
Азербайджаналде, доб Жулжаналде,
Дунял бакьулъ бугеб КагIба рукъалде
Зодосан гIодобе хабар щвечIодай
Аллагъасул гIабид накълулъанилан.
Аллагьасул гIабид, Бичасул вали,
Рияъгиму сумгIат рикIкIад гьарурав,
Гьаб Дагъистаналъул хIакъав гIаламат,
Хвеларев, хвеларев нилъер Загъалав.
ГIелмуялда жанив вухъардачIого
Хвезе чара гьечIев хIакъав гIаламат,
Куллу гIамалалде бецIлъиги тIамун
Собокиясул рухI пашманлъичIодай?
АхIмадил ХатIибги къварилъичIодай?
Бардуз Багьицаги щибдай абила,
Ункъабго бухари ракьулъ букъидал,
Аят меседилаб Къуръан сукIидал
Я мун хванин абун хабар рагIидал,
Гъумекдерил мажгит кIибикIичIодай?
Унго-унго хвараб мухIканлъи лъайдал,
Пахъущдерил мадрас бихъун инчIодай?