Дида дибирзабаз вагIза-насихIат,
Гьабулеб бихьана халкъалда цебе.
Амма дун доб мехалъ лъимер вукIана,
Лъалеб жо гIумрудулъ дагьаб букIана.

Бицунеб букIана садакъабазул,
Вакъфу чирахъалъул, закагIаталъул.
Хадубги бицана росулъ мавлидал,
ЦIикIкIине гьаризе кколел ругилан.

ГIорлъун чвахун ана гIумрудул сонал,
Дида дур макраби ричIчIана, дибир.
Дур вагIза-насихIат, гьабулеб дугIа –
Чияр гъин кваназе дур бугеб махщел.

Мавлид ахIулезул рокъов вуго мун,
Магьари лъолезул рокъов вуго мун
Мохмох къурбаналъе, бащдаб дуй кьуни,
Хъвезе бегьилилан амру дур буго.

Воре, нуж божуге, дир хирияб халкъ,
ТIину гьечIеб бугин дибирасул чехь.
Воре, нуж божуге, дир хирияб халкъ,
Чияр гъин кваналел гьерсихъабазда.