Дун вохула Имам Шамилил инсул,
Эмен Гьаквариса вукIиналдаса.
ЦIумадисезул яхI – Дингал МухIамал,
Васасул гьунараз чIухIула. Амма…

…ЧIахIиял ишазул гучаб чил-чили,
Чиякъго, бесдалго батула дида.
Нилъер умумуца нахъ тараб гIелму,
ГIалималги дагьлъун буго бокIнилъ тун.

Телевизор буго, шахматал руго,
Шагьи-пара кьезе школалги руго,
Гьениб босараб лъай гIад-хочI гьабулев
Гьаб мехалъул лъимер - цIалдохъан вуго.

Исламалъул гьури дур-дир гIелалъул
ГIоркьилазда жеги хъатIулеб гьечIо.
Хъубал пишабазулъ лъадараги щун
Щущалеб буго гьез магIарул намус.

Эбелги чIван лъимал, лъадиги чIван рос,
Басра ясги гьайюн эбелгун-эмен…
Къисаслъун гьещтIолеб гуллил ритIухълъи -
Пун свинел чирахъал Дагъистаналъул.

Москваялда чIварал нилъер гIолилал,
ГIамал цIунун хванин лъица абилел?
Лъил васал дол ругел, лъие камурал,
Доба гьез цIунараб Дагъистан кинаб?

Дун дозул пишаби шакаллъунги ккун,
Кан бакун бакъ свине гьабулев гуро.
Амма дол хванилан нилъер умумуз,
ЦIунараб хазина хиралъарабдай?..

БукIана дир ватIан гъазаваталъул,
Гъансито гIуцIараб гучаб къуватлъун.
Доб мехалъ рухI кьурал гъазизабазул,
Ирсалде гъегъги бан бегьиларо нилъ…

ЦIарги чIван абизе заман щвечIодай
Даим такрарлъулел нилъер мунагьал…
Умумузул ирсги васазул борчги,
Базаразда ричун чилъиларо нилъ!..

…Лъала дида имам Шамилил къиса,
Къине кколареблъи гьаб дир ракIалда…
ЧIама-багвалазул, цIумадисезул,
ЦIаруде буссине ккола намус-яхI.