Эбел, мун къокъидал, къо дуй тIагIиндал,
ГIураб къварилъиялъ къвал бана дида.
Къаникь мун тIупараб, тIад къанал чIвараб
Даим цебе чIола мун камураб къо.
РекIел къварилъиги, тIулал бухIиги,
ТIаде загьру балеб унтул кутакги,
Къоязул роржун ин, сагIтазул хехлъи,
Дур калам къотIараб къодул рикIалъи.
Рии бачIинадай иххги тIаса ун?
БецIцIулеб дир рекIел кIутIи чIеладай.
Хасел ун ихх швезе амру бугодай,
Шапун ун аскIове дун кидал щвелев?
Гордал-нуцIби къараб, къавулъ сас гьечIеб
Гьаб мина-къаялда къоял кин инел?
Къваридав чучизе аскIов чи гьечIеб,
Гьаб гьоболлъиялъул лъугIел бугодай?
Дуца каранде къан къойил къачIараб
Гьанже дир черхалда цо кило гьечIо.
Гъиз базеги течIеб, квенги цIорочIеб
Дур тIалаб кIоченчIо, хирияй эбел.
Дарман тIагIун буго, ияхI хун буго,
Бортун ана къалам, кьана бералги
Адаб тун абула рагIаби гуро,
ЦохIо дун хутIидал къваридго вуго.
ТIаса лъугьа, эбел, киналдасанго
Дун налъулав вугин кидаго дуе.
Воре, гIайиб баге дагьав чучанин,
Ахир буго кIалтIа кIутIулеб диде.