АнцIила микьго сон, гIолохъанаб гIуж,
ГIумруялде гали тIамулеб заман,
Воре, гIолил ясал, тIамулеб гали,
АнцIцIул ургъун тIаме, мекъса ккечIого.

Амма, мугIрузул бис, мун лъаралдаса,
Лъавудаса ана, берзул нур ссуна.
Сапаралъ унелъул пикрабалъги мун,
ХIалтIуда, рокъойги – кидаго мунгун.

Хирияв, вокьулев, дир дару, дарман,
Чорхолъ унти ккана мун сабаблъун дир.
Ва тIолго гIумруялъ сахлъугейилан
Лъуна дуца ругъун гьаб дир черхалда.

Щибилан абилеб гьаб гIумруялда,
Жиндирго чваххи ккун унеблъидал гьеб.
Щибин гьабун телеб гьаб къисматалъе,
ГьадигIан бакIаб гьир борхизе ккедал.