ХъахIилаб зодосан роржунел хIанчIи,
Дунги цадахъ яче нуж унелъуе.
Гъваридаб ралъдал лъелъ лъедолел ччугIби,
Урхъула дун нужер эркенлъиялда.

Гьудул, чIалгIун бугин гьаб гIазаб дида,
ГIададайин унеб гьаб гIолохъанлъи.
Дица гьарун гурин духъ рокьи ккараб,
Рокьуй нух къотIуге, гIазизав гьалмагъ.

Ялъуни рокьуе хилиплъунищ мун,
Цойгийищ дуй щварай, чучунищ ккарав?
ГIамал хисун бугин, рекIел хазина,
Дий гIазаб кьечIого рагье дие ракI.

Цо-цоял рокьийин гьарделел ругин,
Духъ рещтIараб рокьул къимат лъай, гьудул.
Яги заманги ун, гьудулги чIалгIун
Цойгидалъухъ хиял гьабулевищ мун?