Огь, дир магIарулав, рекIел къварилъи,
Бахъун ракIдай кьелеб духъ балагьизе.
Гьалаглъи, гIасилъи духъ ккараб рокьул,
Кин гьаб свинабилеб лъаларо дица.

Мунгун бараб сагIат минутан ккола,
Мунгун бараб минут секундан ккола.
Мун аскIоса индал дир ракI гIодула,
Мун гьечIеб бакIалда дун къварилъула.

Щайзедай, хирияв, нилъей гьаб гIазаб,
Гьадингоги къокъаб гьаб гIумруялда?
РачIа кIиялго нилъ цадахъ рукIине,
Рокьиги гIищкъуги рекIелъги цIунун.