ТIаса лъугьа, дир вас, мун инсудаса,
ГьадигIан хехго дун ракьулъ унилан.
ТIокIаб гьабизе жо дие хутIичIо,
ТIолго гьудулзаби рагъда рукIана.

Холев вуго, дир вас, хвалил гулла щун,
Район цIунулаго, ракь цIунулаго.
Холев вуго, дир тIинчI, дуй, дур гIелалъе,
БацIцIадаб, роцIцIараб зобги нужей тун.

Хирияв МухIаммад, мун гьитIин вуго,
Дуда жеги щибго бичIчIулеб гьечIо.
Амма заман ина, кIудияв гIела,
ЧIухIун вукIина мун дур инсудаса.

МухIамад, кIочонге дуда Гьаквари,
Дур хирияв инсул гIагараб ВатIан.
КIочон тоге, дир вас, мугIрузул гIадат,
МагIарул нич-намус, гIаданлъи цIуне.

ГIарцуй гIоло, дир вас, чилъи бичуге,
ВукIа ритIухъавлъун ва къвакIаравлъун,
Вореха, МухIамад, цоги аманат,
Аллагьги кIочонге, гьесдеги вусса.

Чохьол эбелалъе мутIигIав вукIа,
Къадру-къимат гьабе чIаго вукIаго,
Гьелъий налъулавин мун гIумруялъго,
ХIалкIун цIуне эбел квешлъабаздаса.

Хехго кIудияв гIа, дир гьитIинаб тIинчI,
Хьвадизе вагъаре дихъе вачIине.
Хадубги, дир игит, хабаде вачIун,
Дада, дун вачIанин, кIалъай цо дунгун.

ВачIа, дир хирияв, дир хоб бихьизе,
Хабада тIегь лъезе, дий салам кьезе.
ВачIанин, дир эмен, духъеян абе,
ЦохIо гурин щварав, дир васгун щванин.

ГIе абе гьев дур вас хIинкъи гьечIевлъун,
ХIалихьатаб гIамал чорхолъ гьечIевлъун,
Дун кIочонгутIизе Закаря цIар кье,
Кьварун ниж рагъараб бакIалдеги щва.