Гьазул тIоноцIиб расул
Гуриялъул берцинлъи,
Гьазул релъи–хъуялъулъ
БукIунеб цо кIарчанлъи.

РикIадегIан анагIан,
ГIатIилъула гьазий нух,
Гьазул хIатIазда гъоркь
Ракьалъцин ахIула кечI.

Гьаз гьабураб жо жеги,
Дагьаб букIаниги щиб,
Гьазухъ ралагьун чIарал
ЧIахIиял ишал руго.

Гьазул хьул–анищазул
ГIурччинал гIукIдул цIубан,
ЦIалтун бижизе бугеб
Пихъил пикру гьабула.

Гьазухъ валагьарав дир
Бахиллъизе бачIуна.
Унго, бокьун бугеб куц
Гьазул кьерда вукIине.