ЦеберагIи

Жив жив чиясул ихтияр буго жидерго рекIел дуниялги, дунялалда бугеб бер балагьиги кочIодалъун бихьизабизе, поэзиялдалъун жидерго рохелги, рокьиги, пашманлъиги загьир гьабизе. Гьел кочIодалъун рагIи абулел гIадамал рукIуна ракI бацIцIадал, ракI гIатIидал, гурхIел цIикIарал гIадамал.

Амма унго-унгоял шагIирзаби гIемер рукIунареблъи бихьизабула заманаялъ, цо,чанго цIар гурони цо гIасруялда хутIулеб гьечIеблъи. Бугониги дида кIвечIо дихъе щварал кучIдул тIехьалда рахъичIого тезе. Гьал кучIдул цIаралъе гIоло хъварал гуро. Жидерго рекIел хIал бихьизабун гьезул ВатIаналде, эбелалде, рокьулезде рокьи загьир гьабун хъварал руго. Гьанир руго нилъгун гьечIел къадар щун аразулги кучIдул, ва бахIарчияб хвел босун хваразде гьаруралги. Гьезул цIарал цIунизе гIологи бахъана гьаб тIехь.

Нилъер районалъул рухIияб рахъ бихьизабулеб буго гьезул шигIрабаз. Гьанир ругел авторазул киназулго буго жодорго хасаб бер балагьи дунялалдеги гIадамаздехунги. РухIияб рахъалъулги ургъел гьабулел, гьадинаб тIехь биччазе ракIалде щваразеги баркала буго. ТIехьалъ цIунула нилъер рухIияб бечелъиги тарихги. Цо спичкадул гIучIалъ бухIулеб магIишат цебе кквечIого, бокьилаан рухIияб рахъ цебе кквезе, нилъго гIадамаллъун хутIизе, хасго гьаб гIарцул гурони хабар рагIулареб заманаялъги. Рокьигун лъимералде тIаде къуларай эбел - гьеб буго бищун борхатаб поэзия. Рокьи цIунизе ккола, гьелда сверухъ сверулин аби буго хутIараб щинаб.

КучIдул хъварал гьаб тIехьалда ругел авторал руго жодорго аслияб хIалтIиги, ишалги ругел гIадамал.

КIиабилеб бетIералда лъун руго ЦIумада районалде ва цIумадисезде машгьурал шагIирзабаца хъварал асаралги.