Независимое информационное агентство «ЦУМАДА.ру» rss tsumada.rutube.ru  rss новости 
Подписка на новости




CAPTCHA Image


Логин@tsumada.ru:
Пароль:


(что это)
Заведите почту на tsumada.ru



Информационный портал «Деловая Махачкала»ALLDAG.ru
maarulal.ru

Архив новостей , персон

Назад

Лаилагьа иллаллагь- бищун къуватаб рагIи

Мун бищун бечедав чи гьаб ракьалда,
ГIелму кьун,Аллагьас кIодо гьавиялъ.
Мунагь-хIакъалдаса цIунараб ракIалъ
Рагьун руго нухал борхалъиялде.

Дур цIалараб гIелму гIатIидаблъидал
Мун гIадин мутIигIав муьмин ватичIо.
Мун ниж тIоритIизе таравин вугев,
Рахъ нижер кквезесев Саййидил вакил.

ГIумру зикруялде буссараб буго,
Аллагь рехсанагIан гIатIилъулеб ракI.
Илагьияб канлъи рештIунеб буго,
Как ахIулеб гьаракь рагIараб мехалъ.

Росу рикIкIун кьеги мун гIадав гIалим,
Иман гьечIев чиго хутIунгутIизе.
Чи кантIулеб рагIи, вагIза, насихIат,
Садакъа кIудияб - дур гьаб ракьалда.

Гьород тIамах гIадин гIумру унилан,
Даимаб рукъалъе къачIалев инсан.
Мун тIарикъаталъе хисуларев чи,
Аллагьасде гуреб дур божи гьечIо.

Росулъ дагIба-рагIи рагIизе гьечIо,
МаслигIаталъе мун кидаго вахъун.
Ахцин бакъваларо мун вугеб росулъ,
Лъеда тIад бахъулеб баракатаб квер.

Дур ракIалъул чирахъ, зикру бачунев,
Черхалъул хIакъикьа цIунеян вуго.
Дур хьвади, дур гIамал, гIадатияв чи,
ГIелмудал болъабаз машурлъун буго.

ЖужахIалъул цIекьа ворчIизе гуро
БукIунеб дур нигат гIибадаталъе.
Аллагь вокьи рекIел тIабигIат батун,
ТечIо зикруялъе заман лъалхъизе.

ТIарикъат хисулеб нух батуларо,
Мунагьалъул нухде гьелъ виччаларо.
Гьелъ чIухIи гъанкъула, хъантIи хъамула,
ХIалалаб гурелда аскIов толаро.

Аллагьасе лагълъи, гьелъул шапагIат
Жидеда лъаларел, гIакълу мукъсанал
Ракьалда рихьидал, гурхIула гьезда,
Гьезул мискинлъиян зигардула ракI…

ГIадамазе хIарамаб къабуллъизе кколаро.
ВацIцIадав чиясда нуж хадур рукIа кидаго.
ГIелму хирияв инсан ургъалабаз кквеларо,
Иман щулияб рекIелъ иблис чIезе рес гьечIо.

РекIелъе щолеб рагIи -ТIадегIанасул рагIи,
Гьоркьоб къотIизе хIинкъа, таризе нуж рукIунге.
РаббильгIаламин вуго - дунялалъул БетIергьан,
БитIараб нух батизе батIиял ресал гьечIо.

МагIарда оцазгицин, жалго цIунизе ккедал,
Лълъурдузул свериги лъун,жаниб гъола жанавар.
Нуж гIаксалда рукIунге, диналъул вацал-яцал,
Цоцазул адаб тезе изну гьечIин Бичасул.

Муташаихзабазда хадур хадур унел чагIилъун
РагIугеги кидаго, квешаб нухалъ унгеги.
Жагьиллъиялъин ругел чIвалел нилъер гIадамал,
Лъалареб жо гьикъизе нечон чIоге щивниги…

КьучI бугеб гурони, хабар бицинчIев,
Берцинаб гурони, гIамал босичIев,
ГIадамазе гIоло гIумруги кьолев
КьучIав чияс кквезе буго тIарикъат.

ЛъикIав чи хванани, кIикъого къоялъ
Ракь гIодулин, буго берцинаб рагIи.
ЛъикIаллъун рукIине щиб камун бугеб,
Чи чIвачIого чедищ щвезехъин гьечIеб.

ГIассилъарал ракIаз ракьалдаго щай
ЦIа жалго рухIизе бакулеб бугеб?
Накълулъун хадуса жужахIалъул цIа
Хъвалареб хIалалда щай рукIунарел?

Нилъер ургъалида нилъер устарас
Аслиял пикраби рагьулел руго,
РакI рагьун кIалъалев Гъамбулат-хIажи
ХIакъаб нухалъ ине малъулев вуго…

Лъаялъ гIадинан чи ворхалъуларо,
ТIадегIанлъула гьелъ гIадатиявги.
ЛъикIасул гIумруго-гIелмуялда тIад,
Мунги гIелмуялда тIад чIун - жакъаги.

Мун накъшубандияб тIарикъаталъул
Устар, хIухьлал хьвади зикрулъун ккарав,
РахIманасул цIарал рекIелъ цIунарав,
Гьезул магIнаялъе гIакълу рагьарав.

Нилъер шазалияб тIарикъаталъул
Пикру тавбуялде буссараб буго.
Дуниял бокьани, хъвалебдай мунагь?
ГIумрудул хиралъи! Астагъпируллагь.

Зикруялъ гвангъараб дур ракI бичIчIана-
БецIлъарал къоязе бакараб чирахъ.
Дур ракI тавбуялде буссин бихьана,
Дур пакъирлъиялъул сабру кIодолъи.

РакI хIалхьунеб дунял - дуй гIелму буго,
Пикрудул гъварилъи тIахьазда гьоркьов.
ТIубараб гIумруялъ - мун гIелмуялда,
Жаваб щвечIеб суал дур хутIанадай…

Чи инжит гьавуге, дуе гьев вокьа,
Гьуинлъуда рукIа диналъул вацал.
Мажгиталде ине кватIизе чIоге,
ГIибадат гьечIеб къо нужер букIунге.

ГIумруялъго зикру бачунев вугев,
Аллагьасул цIарал рекIехъе лъалев-
ЛахIдуги гвангъараб букIина гьесул,
Алжанул кавуги рагьун батила.-

Муршид вуго жакъа гIолохъабазе
Жинда лъалебщинаб гьедин малъулев.
ЧIаго цоцадаса тIасаги лъугьун,
Нилъ берцин хьвадизе вихьулев хIикмат.

Гъамбулат-хIажица бицунеб буго:
Хварал чагIаздаги рагIулин гьаракь,
Гьезда гали лъалин аскIобе щолеб,
Жал ракIалде щвараб лахIзатцин лъалин.

Гъамбулат-хIажица малъулеб вуго:
Накълулъарал улбул кIочон тогеян,
Гьаб дуниялалъул дур гъалатIазда
Гъол тIасалъугьине гIамал гьабеян.

Ахираталдаги цадахъ ратила
Цоцазе адабгун рукIарал чагIи.
Цоцазе хириял аскIор хутIила,
Урхъулел рукIарал рихьун хIалхьина.

БитIараб нух кквеян бицунеб рагIи
КIочене рес гьечIо гIенеккаразда.
ГIумруялда нилъер ккараб божилъи
Билизе гьечIолъи гуребищ талихI.

АхIи балев вуго мун гIадамазде:
Абулеб рагIиги лъолеб галиги
ХIисабалда тейин, жаваб кьолеб къо
Нужехъе щвеларин ракIалде ккоге…

Аварагасул заман,хасаб нур бугеб дунял,
РацIцIалъарал ракIазул гIадамал гьесда сверухъ.
Амма заман анагIан, ракIал риццалъанагIан
Иман щулалъизеян, цебе лъураб тIарикъат.

ГIалимзабазул гьеб нух, гIамал лъикIазул гьеб рахъ,
«Лаилагьа иллаллагь» - бищун къуватаб рагIи.
Гьелдасаги къуватаб рагIи гьечIеб ракьалда
ГьелъгIан БетIергьанасде гIагарде сунца цIалел!

РакIалъ бачунеб зикру бищун хирияб заман-
Дур БетIергьанги мунги, иблисалъе бакI гьечIо.
Дур божи цIикIкIанагIан бацIцIалъулеб Гьесде нух.
Гьесде гIагарлъиялъулъ батизе бугеб талихI…

Дуца къайичIвараб гьаб Муцалавал,
Баракат рештIараб бакIцин гуродай.
Муцалавалалъул лъикIал гIадамал
Мунгун алжан щвезе ругел чагIидай.

Устарасул калам гIинтIамуразул
ТIеренлъун ракI хIайран гьабулеб буго.
Сородулеб гьаракь Гъамбулат-хIажил
ХIалкIолъи рагьулеб бакъанлъун буго:

Мунагь гьечIеб гIумру гIибадат бугин,
РекIел бацIцIалъиялъ борхалъи кколин,
ТIарикъат чиясул талихIлъун кколин,
СиратI гIатIилъизе гIиллалъун бугин.

ЖужахIцин хIинкъулеб жужахIалъул кIкIал
Как тарав чиясухъ балагьун бугин.
Гьаб сордо-къоялда шуябго нухалъ
Къилбаялде руссин сахлъилъун кколин.

Алжаналъул кIулги бараб как бугин,
Какий чурун хвейги шагьидлъи кколин,
Дунялалъул ургъел гIемерлъун бугин,
Гьанирго хутIулел гIадинан ругин.

Иман биларасул берзул балагьи -
Балагьани гъветIцин бакъвалин кколеб
Бишунго какарав как баларев чи -
ЧIегIерлъулеб гьумер ахираталда.

НигIмат гьарзалъанин ракIал согIлъуге,
Берал бецлъаниги, ракIал бецлъуге.
Гъамбулат, дур вагIза - малъи-насихIат,
Чи кантIулеб гуреб гьечIо духъ рагIи.

ХIикмалъи ракIалъул, рекIеда жаниб
Компьютералъ гIадин цIунун пикраби.
Аллагьасул хIалкIвей, кинабго рахъалъ
Инсанасе кьурал кIудиял ресал.

Кинаб къо ракьалда тIаде щваниги,
Нилъеда гурхIила цо ТIадегIанав.
ГIасилъун ине ракI биччазе гьечIо,
ЧIечIого рехсезе вуго цо Аллагь.

Живго цIакъавилан лъугьунев чияс,
Цо духъ гIенеккани,Аллагь рехсела;
Унти чIезабулеб дару гIадинаб
РакI гIодой биччалеб зикру бачина.

Дуца хъвалел тIахьал нахъе хутIила,
ГIелму хирияз гьел ракIгун цIалила.
Балагье, кIодолъи,кIвахI бачахъани,
Чам наслабазе тIехь нахъа хутIилеб.

Аллагь гурхIуледухъ чIаян гьарула
Гъамбулат-хIажица гьал гIадамазда.
БецIаб хабалъ гьечIин нуцIагун горду,
Кире нилъ рорчIилел ракьулъ рукъидал…

БетIергьанасул рагIи гIадамахъе босулев,
Духъ гIенеккун хутIулел киналго муридзаби.
Дур гIамалги гIакълуги мисалалъе лъун бугин,
Мун гIадинав гIалимчи цойги шун рохиладай.

Дунялалъул пикрабаз кIвекIулел ракIал ругин,
Даимаб рукъалъе ниж ургъунго рахъинадай?
Гьеб рокъове чIобого чи жанив виччаларин,
РачIел какал,квечIеб кIал,щибгIагидай гьабила…

Бегьулареб щинаб берцин гьабилин,
КIалъалила шайтIан гьал гIадамазда.
Воре, гьелда хадув унгеян абун,
Халкъалъулго дуца ургъел гьабула…

Сабру кколин буго бащадаб иман,
Огь хехлъулев щайдай ракьалда инсан.
Мажгиталдеги ун какал ралесда
РагIад рехизелъун бицунеб рагIи.

Гьев лъикIав чи вугин нугIлъи гьабуни,
БукIунеб кири щай цебе чIолареб.
Квешлъи гIамалалъул, гIакълу дагьлъидал,
СогIлъиги ракIазул иман тIагIидал.

Мажгиталда балеб рузманалъул как,
Кин нуж цолъуларел цо рокъор ругел.
Муъминал руссунел Аллагьасул рукъ,
Аллагьасе гIоло, рокьа цоцазе

Аллагьин ахIулеб гьаракь букIадго,
Гьаб нилъер дуниял пасалъиларо.
Божи цIикIарасул, как толаресул
Рокъоб бугеб баркат тIагIун ккеларо.

ЛъикIлъиялъул нигат гIедегIун хъвала,
Гьеб гьабичIониги, нигат хутIила.
Квешлъиялъул нигат хъвазего гьечIо,
ГьабичIого тани, гьоркъоб биччала.

Унеб бугин борчIун къо жакъасебги,
ГIибадат гьабизе нилъ регIанадай.
Къаси вегулелъул рогьел щвезегIан
ХутIиялда божи гьечIеб дуниял!

Исламалъул канлъи - гвангъараб дунял
Как балесда гIадин нур букIунаро.
ГамчIиде сверизе ракIал риччаге,
ЧIегIерлъизе гурин ракьалдаго нуж.

Аллагьасул цIаргун гирулеб магIу,
Хъвазе теларо гьелъ жужахIалъул цIа.
Божи загIиплъидал бохулеб иблис,
Бохизе теларо - дун мурид йиго.

БорчIун унеб гIумру бер къанщилелде,
Унеб заманалъул гьабичIеб хIисаб.
ХIал бихьизе кьурал гIумрудул къоял,
Къосине риччаге, БетIергьан Аллагь.

ШаригIат, тIарикъат - дир ракIги рухIги,
Божи щула гьабе БетIергьанасде.
ШаргIалъ какараб жо тIад ретIиларо,
ШаргIалда хIарамаб квенги квинаро.

РавхIанияб дунял, рекIел бацIцIалъи,
ЦIикIкIараб гIелмудал гъваридаб пикру.
ГьечIо дир абизе цониги рагIи,
Дуца абуралда разилъун гурей.

Алжаналъул кIулал кодореги щун
Нижей шафагIатлъи щолев ватаги,
АлхIамдулилагьин, разилъун чIарав,
Разилъиялъулги ханлъун вахъарав.

РацIцIалъиялде ниж ахIулеб гьаракь,
Гьеб меседил буго гьаб дунялалда.
ХIакъикъияв муъмин, Аллагьасул лагъ -
Гьеб бишун кIудияб даража буго.

Мун мутIигIлъанагIан, гIелму тIокIлъиялъ
ТIахьазул цIураб рукъ буго хазина.
Имамлъун таниги, мутагIил гIадин,
ТIехь рагьулареб къо дур букIунаро.

ГIумру гIелмуялда нухилан тарав,
Тариларо, устар, дур нухдаса дун.
Къилбаялде вуссин дуняллъун ккарав,
РекIелъ кквезе буго дица дур калам…

Тажудин- афандил амру тIубазе
Муцалавалалда - Гъамбулат-хIажи,
КIудиясул рагIи гIодоб течIого,
Имамлъун хIалтIула гьев мажгиталда.

Муцалавлалда мадрас рагьана,
Аллагьасул калам Къуръан малъула.
Гьев жамагIаталда гьоркьов кидаго
ЛъикIабщинаб гьезда малъулев вуго.

Баянал абулел тIахьал хъвала гьес,
ТIолгоялъе жиндир ритIухълъи щвезе.
Муцалавалалда рештIараб баркат -
Цебе цIечIеб мажгит жакъа цIун буго…

Дур гIамалалъул тIокIлъи, гIелмуялъул гъварилъи,
Дун хадуйго гъеларо, лъараб хъвани гурони.
Дур рухIияб бечелъи, дур паймуялъул тIокIлъи,
ТIадюссун ургъанагIан, гъаримлъулеб буго ракI…

Алжаналъул рокъой нух батиладай,
Садакъа кьезелъун квер битIичIесда.
ГIадамазе лъикIлъи гьабизе щвани,
Рохаян малъулев Гъамбулат-хIажи.

Аллагьасде гурев кив мун вуссинев,
Иман бугелшиназ сверухъ ккун гIурав,
РабитIа гьабизе божилъиялда
ХIусен-афандияс гьитIинго тарав…

Аварагасул свери сайигъатлъарав гIалим,
Гьеб ракьалдаса урхъи буссунарев мугIалим,
Масжидул хIарамалда рамазаналъул кIалгун
АнцIила щуго нухалъ Къуръан цIаларав къарчъ.

Иорданиялдаго кIудияб мажгиталда,
Жаниб бакI щвечIез къватIиб как балеб кIалгIаялда,
Мажгиталъул кIудияв имамас тIамун гурищ
Гъамбулат-хIажиясда Къуръан цIализабураб.

Гьес цIалулеб къагIида рагIараб мехалъ гурищ,
Къвал бан гьесда баркизе, имам аскIове щварав,
ХIарпал рахъиялъул рахъ рекъон бугин гьаракьгун,
Гьоркьоб гъалатI гьечIого, цIаланин дуца абун.

Нижедаса духъ цIали тIокIаб бихьулеб бугин,
Баркун буго гIемерал гIалимзабаца гьесда.
ГIамман шагьаралдаги гьабураб къимат гьесул -
Гьел киналго рахъана нухда гIалим регIизе.

Сириялъул муфтияс, АхIмадул Кафтарияс,
Жиндирго мажгиталда бараб мадрасаялда,
Лъабго моцIалъ жанив чIун,жиндир хIикматаб цIали
ЦIилъизе гьабун буго гьав Гъамбулат-хIажияс.

Гьес имамлъиялъулгин хатIиблъиялъул диплом
Мударислъиялъулгин цадахъ гурищ босараб.
Гьениб гIалимзабазе кколеб баркалаги кьун,
Алжан щун рохагиян, дугIа гурищ гьабураб.

Дарс кьуравщинав чияс гьевги кIодо гьавуна,
Гъамбулатие лъикIаб къимат кьун гьел кIалъана.
Гьениб гьес гIараб мацIалъ гьабураб калам рагIун,
ГIажаиблъун хутIарал гIалимзабиги ккана.

Мун доб Димишкъиялда кIалъарав заманалда
Разилъи лъазабуна гIемерал гIалимзабаз.
ГIарабиязде дуца гьабураб хитIабалъулъ
Дагъистанго чIухIилеб хIалалъ гIелму лъай буго.

Дуца Димишкъиялда бицараб рагIиялъул
МагIна рагIизе лъикIан тIолго Дагъистаналда.
Дуца зияраталъе росарал тIолго бакIал
Такрар гьаризе лъикIан нилъер хIажизабаца…

НакIкIаз бахчараб дунял, чи цоцазда вихьилищ,
КъваригIел гьечIеб хабар, хIакъикъат кодой щвелищ.
Хунищ, вахъунищ вугев аскIов вугев, лъаларо,
Кумекилан ахIдолеб гьаракьцин рагIуларо.

Цо нух бугин абула, Аллагьасде руссаян,
БацIцIалъулин гьинал ракI, роцIун унин сверухъ бакI.
Мажгиталде нух кIочон, нуж гъапуллъизе чIоге,
Аллагь гурхIулев вугин, нужги цоцазда гурхIа. -

Дирго рагIи лъезе бакI гьечIеб дуниял буго,
Дие Гъамбулат-устар гъваридав инсан вуго.
Дур борхалъиялде дун щвезе гьечIейлъи лъала,
Мунагь-хIакъалдасаги хIинкъарайлъун хьвадила…

ХIинкъун йикIаниги, къалам босарай,
Ихтияр гьечIого хъвазе яхъарай,
Паризаябцини гьоркьоб хутIарай
Дуда цее чIезе нечон йигей дун!...

Лъалелдаса лъалареб гIемераб гьаб дуниял,
РакIалдего ккечIебги бихьулеб нилъер гIумру,
Лъаларел гIадамалги дандечIвалеб хIакъикъат,
ХIакъаб нухде ячIине нух батараб дир къисмат!..

Сордо-къо хисулев дир ТIадегIанав,
Рецц буго, БетIергьан, дуе гьабулеб,
Дун хадуй гъолареб гьаб гIумруялда
ЙитIун ккезе гьае дуца, дир Аллагь!

Аллагьасда гуреб лъидаго лъачIо
Лъил ругеб бацIцIадаб гьинал ракIалги.
Рихьдае кьеларо дица садакъа,
ЦIаралъе баларо паризаяб как.

ХIакъал муъминзаби - рацIцIадал ракIал,
Аллагьасул канлъухъ киналго руго.
Аллагьас цIунарал мукIурал лагъзал -
ЛъикIаб гуреб гьезда бихьизе гьечIо.

Аллагьин рехсолеб дирги рекIеца
Рагьизе хьул буго нух борхалъуде.
«Амма устар гьечIел - вехь гьечIел гIиял»,
Устар ватарай дун талихIай ккола!
Назад


Метки персоналии, новостей и фоток!
Абдурахман, Литература, Сироти, Ювенал, Спорт, Сагада, Абдулхабиров, На аварском, Публикации, Связь, Видео, Согратль, Харайчо, Анди, Кокрек, Инхо, Абдлухабиров, Кавказ, Кочали, Хонох, Сажид, Атлетика, Медицина, Тленхори, Сагада, Гигих, Стройка, Культура, Персона, Защитники, Саситли, Ущелья, Ричаганих, Нижнее Хваршини, Цедатль, Стихия, Мечети Багвалал, Стройка, Я-Политика, Мечети Тиндалал, Водопады, Гакко, Лесные, Хварши, Хварши, Акнада, Мечети Чамалал, Ургелой (Аркискент), Цумада, Нижнее Гаквари, Ислам, Кенхи, НЕ_ИЗВЕСТНО, Гимерсо, Хуштада, Аулы левобережья, Фанклуб, Утварь, Саситли, Быть, Эчеда, Водоемы, История, Хуштада, Кеди, Ремесло, Саильди, Инхоквари, Тисси, Школы левобережья , Фауна, Персона, Сильди, Селения, Этнос, Ангида, Кенхи, Нижнее Гаквари, Села в Хасе, Ахират, Тлондода, Квантлада, Хваршини, Цумадинцы, Мосты, Чонтаул, Шава, Иллюстрации, Религия, Хутор, Тиндалал, Кутан, Спорт, Турнир Кади, СельХоз, Награждение, Ретро, Туризм, Новости, Тинди, Сантлада, Гигатли, Образование, Война, Пейзаж, Горы, РетроПерсона, Тилси, Школы правобережья, Стихия, Кутан Акнада, Флора, Цунтаккал, Транспорт, Кванада, Объекты, Атлетика, Верхнее Гаквари, Мечети в Ункратле, Кеди, Школа, Минарет, Тинди, Мероприятия, Джамаат, Аулы правобережья, Кванада, Мечети на равнине, Борьба, Акнада, Спортсмены, Тлондода, Школы на равнине, Природа, Цыхалах, Гакко, Аща, Реки, Чествование, Альпинизм, Инхоквари, Собрания, Чамалал, Цумада Урух, Верхнее Хваршин, Гигатли, Мельницы, Хонох, Фотки, Верхнее Гаквари, Хвайни, Судейство, Лес, Эчеда, Тисси, Гимерсо, Этнос, Гадири, Санух, Гьаквари ккал, Агвали, Медицина, Гадири, ПроНас, Хушет, Тисси-Ахитли, Метрада, Тенла, Агвали, Тазият, Махач, Газета, Санух, Гигатли Урух, г.Хасавюрт, Мечети в Эхедемухъ, Туризм, Гачитли, Природа, Турнир Абакарова К., Самбо, Хъулухъ, Новосаситли (Хас. р-н), Осетия, Ботлих, Гергебель, Теречное, Медресе, Ветеран спорта, Сагид, Поздравления, Конкурс, , Урари, Зашитники, Стих, Наука, ДТП, ,

© 1999—2013 Сайт культурно-исторического наследия цумадинцев
Техническое и финансовое обеспечение: Магомед ГАДЖИДИБИРОВ и др.         автор проекта — Гусен ХАЛИЛУЛЛАЕВ
e-mail: gusen_ha@mail.ru   тел. 8-963-79-74-007 skype: gusen76
Вариант для печати вернуться в начало сайта
Мнение редакции независимого информационного агентства ЦУМАДА.РУ может не совпадать с мнением авторов статей, которые несут ответственность за достоверность приводимых данных в своих публикациях. Опубликованные материалы могут содержать недостоверные данные. Все материалы данного сайта являются интеллектуальной собственностью их авторов, полная или частичная их перепечатка без разрешения редакции запрещена.