Тажудин устарас Шагьрурамазан
Гъамбулат-хIажида хадув витIана,
Хехго гьев жиндихъе ахIеян абун,
Ва балагьун чIана гьев вачIиналъухъ.

Гьеб январь моцIалъул квачарал къоял.
Гъамбулат ахIизе вачIарав чапар,
ХIетIе-кверги бухIун вугев Гъамбулат,
Устарас ахIидал,хIалакун ана.

Щуявго гIилмудал гIалимги ахIун,,
Гьез мажлис рагьана, нугIзал ракIарун,
Гъамбулат-хIажие устарлъи кьолеб
Ижазалъул буго гьаниб бицунеб.

Гъамбулат-хIажица гьеб жавабчилъи
Дида тIад щай къазе кколеб абидал.
Бичасул амруялъ Хизри авараг
Цеве чIанин буго жаваб гьабулеб:

Аллагьасул рахъалъ бачIараб илгьам,
Гъамбулат устарлъун теян абураб,
Хизри аварагас тIад къараб гуреб
ГьечIо, дир вас, дица дуда абулеб.

Васигат гьабуна, шаргIалда рекъон,
ВитIун хьваде абун, кинабго рахъалъ.
Нух малъулев чилъун толев вугелъул,
РакIбацIцIалъи бугин аслияб хIужа.

Дурго ишалги тун, муридзабазул
Хъулухъ тIубай буго тIадаб дур налъи.
Тавбу гьезда малъе, хIинкъи тIалабгун,
ТIолго рахъалъ битIун хьвадизе шартIгун.

ГIасилъулеб рагIи рикIкIадагIан те,
Как-кIалалъ гIадинан вацIалъичIин чи.
Аллагьас бокьараб бокьарасе кьун
Гьаб дуниял толин,сабруян малъе…

Гьанжеялдаса гьал диналъул вацал
Дуца нухда лъеян, ижаза кьуна.
Кьалде ахIичIого,ракълиде ахIун,
Иманалъул агьлу гьесда тIад къана.

Канлъи ун бугелъул, жинца хъвачIого,
ГIабдурахIманида хъвазе тIад къана.
Гъамбулат-хIажида, инкар гьабизе
Ихтияр гьечIолъи бичIчIизабуна.

Устарлъи щолебищ гIелму гьечIони,
ГIелмуги камилав Гъанбулат-хIажи,
Мун шайихзабазул силсилаялде
Цо меседил гIекIлъун вукIиналъ щвана…

ШаригIатги цIунун мухIкан хьвадиялъ
Валилъун хутIила Халикъасул мун,
Тажудин-афанди,ижазаги кьун,
Ургъелги тIаса ун,накълулъана мун.

Тажудин хванилан, кинан божилев,
Дуда цебе гьесул рухI босаниги.
«Аллагь киназдаго тIаса лъугьаги!»-
Гьеле, устарасул ахираб рагIи.

Гьеб къо кин борхараб, Гъамбулат-хIажи?
ДуегIан лъиего гьев камунадай?
Гьев кIочараб къоги дуде бачIинищ,
Тажудин шайихас васлъун рикIкIарав…

Дуда божи лъурал гIалимзабиги
ГIемерлъулел руго Дагъистаналда.
Духъа вирд босарал муридзабазул
Яцлъун дунги йиго гьанжеялдаса.

ХIумайд-афандияс ижаза кьурав
ХIусен-устарасул мурид Гъамбулат.
ХIусен-афандихъан ижаза щварав
Тажудин-устарас тарав дир устар.

Дуда чи вихьула, балагьичIого,
Бецав устарасда вихьарав вукIун.
Бецасул ижаза хIакъикъияб борч,
ХIакъаб нухда вукIун, гьесда вихьарав.

Нилъеда бараб жо щибниги гьечIо,
Амру билъанхъула ТIадегIанасул.
Бецасда бихьараб бихьуларезда,
Берал ругониги,божи дир гьечIо.

Гъамбулат-хIажи,дур охрана гьечIо,
Аллагьас цIунила,алхIамдулиллагь.
Дир хъвалел мухъазде ккарав гьев гуро,
Киназдаго гьев лъай дир мурад буго.

ХIакъав устарасе рагьулеб пардав,
Гьеб хIакъикъат лъалев цо Аллагь вуго.
Воре, муршидазде рагIад рехуге,
Рихине гурин нуж Аллагьасдаги.