|
| |
НазадАлхIам цIалулесда гурхIулев рахIим
КIудияв инсуца Гъамбулатида
Анлъго сон балаго къуръан малъана,
КIудияб гъирагун гьитIинго рокьи
Зоб-ракь бижарасде бижизабуна.
Хадуб, Метрадаса ГIабдулгIазизил
ХIусенихъе хьвадун, гIелму цIалана.
ГIалимзабазухъе Гъамбулатил ракI
ГьитIинго цIалаан,цIорочIо хиял…
Рокъосез исламалъул хIайранго бицунаан
ХIусен-афандиясул цIар гьоркьоб рехсолаан,
Гьеб гIемераб рагIиялъ гIащикълъарав Гъамбулат
КIудияв устарасухъ урхъун вуго гьитIинго.
ХIусен-афандиясул муридзабазухъе ун ,
ГIелму бугевщинасул гIелму тIалаб гьабуна.
АхIмад,МухIамад,ТIагьир,Расул,Абу-Супьян,
Гьесда гIелму малъарал мугIалимзаби руго.
Дунял ахираталъул кIиялгоги гIулумал
ХIал кIвараб куцалъ гьесда лъазабулел рукIана
Амма къвакIараб заман, диналде данде чIараб,
Гъамбулатие рахIат хвезабизе лъугьана.
Халкъ гIемераб бакIалде гIатIиракьалде витIун
ЛъикIин Гъамбулатилан инсул пикру бачIана.
Васасул гIелмуялде бугеб цIайи бихьидал,
Вахчун цIализе телин ТIагьирица абуна…
КIочонаро чIумал сверулев эмен,
Анкьалъги хIадурун, тавбуги гьабун.
Гъамбулат вачине бегьилищилан.
Устарасухъа гьес изну босана.
Гъамбулат росулъа къватIив иналде,
Гьесда баркат лъезе дугIа гьабуна.
ТIагьир-дадаца гьев вачунев вуго,
Гъамбулатил анищ тIубалеб буго…
Дин гьабизе гьукъараб заманаялъул сапар
Сордо бачIунеб гIужалъ щвана гьал устарасде.
Бищунго кIочонареб гьеб сордо хутIун буго
Гъамбулат-хIажиясе тIолабго гIумруялда.
ХIусен-афандиясухъ балагьизе ихтияр
Инсуца кьун букIинчIо, гьеб адаб тей бугилан.
Гьесухъ балагьичIого Гъамбулатил ракI чIечIо,
Гьев вихьаравго гьесул чорхол хIалги хисана.
Нечоге, дир василан, устар гьесда кIалъана,
Чирахъги свине гьабун, гьесда тавбу малъана.
Накъшубандияб нухлул авалалде вачана,
Вирдалъул тIадкъаязде Гъамбулатил ракI цIана.
Гьесда бажариладай, гьитIинго вугелъулан,
Инсуца устарасе хIинкъи загьир гьабуна.
Гьасда бажарулилан, устарас жаваб кьуна,
Аллагьин абураб хатI рекIеда хъван бихьанин.
Устарас аскIовегIан гIодов чIезе гьавидал,
Щиб гIаламатдай жинда бихьилин гьесда ккана,
«Аллагь гурев щибниги рекIелъе биччагеян,»
КIудиясул калима кидагоялъе ккуна.
Дир вас, дуца гIумруялъ гIелму тIалаб гьабеян,
Гьеб бишунго кIудияб гIибадатги бугилан,
ГIелмуялда рекъараб гIамалги къваригIунин,
ГIамал гьечIони пайда гьечIинги абуна гьес…
Гьеб къоялдаса дур ракIалъул гIищкъу
ГIумруялъго ана Аллагьасде цIан.
ХIусен-устарасул назму лъанагIан
ЦикIкIана рекIелъ Бичасде рокьи.
Мун кантIизавурав устар хваниги,
Хобгицин хутIана дуй мугIалимлъун.
Гъамбулат, дур устар - пикрабазул си,
Сунеб канлъи гуро дур гIумруялда.
БитIараб гурони, рагIиги нухги
Гьес дуда кидаго бихьизабичIо.
Гьес дуда гьитIинго малъарабщинаб
РухIалъ цадахъ ина дунял толелъул.
ГIабдулатIиб-дибир Гуниялдаса,
Гьесда аскIор дуца цIалана тIахьал.
Гьев накълулъун хадуб,дур мугIалимлъун
Мокъсоса ватана ХIажимурадан.
Гьев вукIана гIалим гIамал берцинав,
Мадрасалъун жиндир рукъги лъугьарав.
Цо сордоялъ гьесул гьаракьги рагIун,
ВорчIанин бицана Гъамбулатица.
Дуе щиб ккарабан,гьав гIагарлъидал,
ГIодилаго гIалим гьасда кIалъана:
Макру гIемераб жо бугин дуниял,
Заман хехго унин, гуккизе гурин…
Хехго боржун унеб заманаялъул
Лъимералда рекIелъ хутIана гьебги.
Ханлъицин кIвар гьечIин, Гъамбулатида
ГIелму хиралъиялъ кIочараб дунял.
Аллагьасул цIарал рехсолеб дур ракI
Иллагьияб нуралъ цIун бугин ккола.
Лъихъ рештIинеб лъикIлъи дуде гурони,
Лъихъе щвелеб гIелму,духъе гурони.
Гумбет ЛъаратIаса гIалимчи Вали,
Гьесухъе ана гьав хIадис цIализе.
РиччачIо цониги дарс лъечIел къоял,
Къаси кьижичIого рорчIана сардал.
МугIалимзабазде хасаб балагьи
Кидаго букIарав нилъер Гъамбулат.
Гьес дунял борцана гьезул лъалкIазда,
Гьезул цIадирабаз цIалаан гIамал..
Хасавюрталдаги мугIалимзаби
ГIалимлъи щулиял щвана гьасие.
ТIабигIат къвакIарал,ритIухълъи ккурал,
Киналго рукIана унго-унгоял.
ГIелмуялъул тIахьал жеги цIалеян
Гьал ракIал гIорхъода нилъер рукIине,
Абулаан ХIасан-устарас
МугIалимзабазда,гIалимзабазда.
Аллагьасе рагьун гIажаибаб ракI,
Гъамбулат мутагIил вугеб замана,
Тажудин-устарас васлъун рикIкIана,
Гьесул рокъов гIуна, гIелму цIилъана
Тажудин-афандил амруялдалъун
Ав ана Сасикье,цIикIкIун цIализе,
ХIабибулагьихъе,жив цIакъ божарав
Муридлъун вукIарав гIалимасухъе.
ГIелмуги гIамалги рекъарав гIалим,
ГIорхъи гьечIеб лъикIлъи букIана гьесухъ.
Сасикь росдаего гьесул баракат,
Гьеб хасало щвараб бакъ гIадин буго.
ГIумруялъул гьудул,мутIигIай лъади
Марьямги йикIана рукъалъул хIуби.
Гъамбулат жидерго вас вугевгIанги,
ГIорхъудаса араб адаб гьабуна.
КIочонаро дуда ЗайнулгIабидгин
Паризал МухIамад,Ханмирзал МахIмуд
Ва ЧIегIеров МахIмуд,СагIаду гIалим
Диналда ратарал вацал рукIана.
ГIумруялъ хутIана рекIелъ рокьиги,
ГIелму лъазабизе шавкъалъул гучги,
Диниял тIахьазде тIаде вуссинги
Нилъер Гъамбулатил хасияталъулъ.
ГIалимлъун вахъана Гъамбулат-хIажи,
ХIежалде риччалел къоял щвелалде.
КIочон течIо жиндир мугIалимзаби,
Гьев васлъун вукIана гьел киназего.Назад
|
|
|
|
