КIиго нус буго гьаб дуниялалда,
Цояб гIумруялъул, цо гIажалалъул.
ГIажалалъул носокь чан чи сукIарав?
ГIумруялъул носокь чан чи сахлъарав?

Дур дарудал носокь дунял цIилъарал,
ЦIарал гIемер руго гьудул ГIумаров.
ГIумру дур квераца халат гьабураз,
Херлъугеги мунан буго гьарулеб.

Дуца бох къачIарав ТIелекьа чияс,
ТIадегIанасде дуй талихI гьарана.
ТIилалгун вачIарав Алмахъав гьале,
Аллагьасе реццин тIад вуссун ана.

ТIасахIетIеялда ноцIалгун щварав,
Нухда дурун ана ДаргимухIамад.
Дур даруял квераз катан бахъиндал,
«Как хорошо»-йилан кIалъана Петро.

Гьаб Дагъистаналъул вассал цолъизе,
Дур носол гIадинаб сабаб киб бугеб?
Сахал пикрабаца ракIал тирхулеб,
Тохтурасул гIадаб гьунар лъил бугеб?