КватIичIого росулъе, цIалиги лъугIун, тIад юссун ячIана МухIамадил яц Шамсият. БачIинахъего йокьула Написатие гьей, цоцадехун цIакъ лъикI рукIунел гьудулзабилъун лъугьана Написатги Шамсиятги. Зама-заманалда гьелде балагьун хутIулаан Написат, кигIан берцинайха гьай йигейилан. «МухIамадго гIадинай йорхатайги, гьесулго гIадал чIегIерал бералги» абун, элъул пикрабазда йикIунаан Написат.

Цо нухаллъ МухIамадица абула Написатида:
- Дир яц къваридго йихьулей йиго дида. Дуца къварид гьайичIогогIаги йигищ гьей? Цебе гьединаб гIенеккунчIей букIунароан гьелъул…

Гьебги ракIаде щун, гьелъ цIехола Шамсиятида:
- Шамсият, дур вацасдаги ургъел чIван буго, мун цее гIадай гьечIин, къварид йигин абун. Щиб дуе ккараб жогIаги. ДидагIаги бице. Дун дуе чиярги гурин, чиярилан росулъ рикIкIаниги. Унтунцини гурищ мун?

Шамсият жаваб кьечIого, гIодилаго жиндирго рокъое ана. КъанагIат гурони, азда аскIоецин къаларей лъугьана гьей.

Написат ургъел чIван йикIунаан, щай Шамсият жиндаса рикIкIалъун чIолейилан. Кида Написат гьелъухъе жание лъугьаниги, машинаялда нахъа гIодойги чIун, гьелъухъцин ялагьичIого, юкъарулей йикIунаан гьей.

Цо къоялъ Написатица МухIамадида абула:
- Дун дур яцалъе йокьулей ятиларо…
- Щиб бицуней мун? ЦIакъ еццун йикIана гьелъ дие, лъикIай чIужу щун йигин диейилан. Мун цIунеян, мун ракI лъикIай йигилан, абула гьелъ. Хеккого эбел-эменги хун, хутIарал руго ниж. Гьединлъидал батила цоцазе хириялги руго. Дие гIадин дуеги йокьизе ккола гьей.
- Лъаларо, гьей гIадай берцинай гьечIелъул дун…
- Берцинлъи букIуна рокьиялъулъ, дур росасде бугеб бербалагьиялъулъ.
- БичIчIула, бацIцIадаб рокьи буго дие кIудияб борхалъи гьаб дунялалда.
- Гьединлъидалха ячарай дица мун бищун борхатаб росулъе,- ян махсаро гьабула МухIамадица. - Мун хIинкъичIо гурищ гьание яхине?!
-ХIинкъичIоха мунги аскIов вукIун! Гъоркьа тIаде дур росу дуца бихьизе гьабидалги хIинкъичIо. Гьал рукъзал цIудул бусабилъун рихьулел рукIаниги хIинкъичIо...

Кидаго рокьигун балагьулаан гьей жиндирго росасде. Жий хадуй гъолареб борхалъийилан кколаан гьев гьелда. Гьесдаса хириявги гIагаравги чи вукIинчIо гьелъие ракьалда. Аллагьас къанагIат биччалеб батилин ракьалде гьадигIан бацIцIадаб рокьиги, къанагIат данделъулел ратилин гьадигIан цоцазе рокьулел гIадамалгийилан кколаан гьезухъ балагьидал.
- Написат, дирго ракI рагьун, дуда дунги кIалъачIевани, дуе дунги вокьун вукIаравани, дуца дида гьеб рагьун бицине букIанищ?
- Лъаларо, кIвезе букIун батиларо. ГIумруялъго гIенеккун чIелаан дун. КIудияб рокьи гIинтIамун чIолин ккола дида.
- Щай, Написат, дуда гьедин кколеб?
- Щай гурелъул, дир гьудул, гьединаб гIищкъу холарелъул, данде рокьи гьечIониги. Дида ккола гьединаб рокьиялъ, жиндие гуребги, сверухъ ругезеги хинлъи кьолин; гьединаз, гIадамазе лъикIлъи гуреб, квешлъи гьабу-ларин ; гьединаб рокьуца ккараб къо борхизе къуват кьолин…
-БитIараб буго, Написат, гIадамал жодорго рекIехъги гIенекулел ани, ракьалда квешлъи дагьлъилаан. Амма мун шагIир гIадин кIалъалей йиго, кучIдулгIаги хъваларищ дуца.
- Хъваларо,- ян елъула Написат. - ЦохIо шагIирзабазул гуребги, гIадатиял гIадамазулги ккола гури, МухIамад, рокьи.
- КIочонге дуда, рокьи гIицIго байрамкъо гуреблъи. ГIемер жо баччизе ккола рокьуе гIоло.
- Дуе гIоло бокьараб къо борхизе дунги хIадур йиго. Дие гIоло мун хIадурав вукIинги лъала.

Написатица росасда къвал бала.