Щабаб къотIноб буго къойилго базар,
БоцIухъан вачIани букъула аз зар.
Бихьинал цIуяца цIехола пивбар,
Хурибго бакъвалеб буго азул чIар.

Сордокъоялъ рагьун супермаркетал,
Лъималазе кьезе гьечIел конфетал.
«Откатал» щваразе бокьулеб пицца,
ХIангун чед щваниги квинаан дица

ХIакимзабаз бокьухъ бикьулеб бюджет.
ЧIабаралда чIвараб хирияб паркет.
Хъизаналъе хинкIихъ хIалтIулел цоял,
ЦIогьабазе «гьурра» ахIулел гваял.

Пагонал ранщиназ босулеб ришват,
Щибаб хъулухъалъухъ чIезебураб шартI.
Бесдалазул рокъор ракъарал лъимал,
Гьеб хIукумат чIахъун рорхулел лълъарал.

Рохьазда гъурулел тIогьолъ бахIарзал,
Гъара гьабун чIвалел чIурканал васал.
Гуллица рорлъунел бахьинал курмул,
Гьузухъ магIу тIолел тIолго умумул.

Лъицадай ургъараб лъугIулареб рагъ,
Кидадай бекулеб гьаб кьалалъул агъ.
ХIинкъа, хIакъалдасан Аллагьасул лагъ
Сверизе ккун бугин сурукъалде мугъ.

Судияз бокьухъе къотIулеб хIукму,
ХIалихьат къватIив тун тIубалеб рукну.
Мискин пакъирасде хъинтIулеб къанун
Хъулби чIахIиязе бахъичIеб закон

Жиндий хъулухъ щвезе чIвалел дандиял,
Данде къавукъани къокълъулел штатал.
Чанта понцIоразе ричулел ракьал,
РекъечIесул къватIи реччолел бакьал.

Мискиназе кьезе гьечIеб садакъа,
Гарбал рицатазе щолеб «напакъа».
Херазул рукъзабахъ кьолел умумул,
Гьезул агъаз гьечIел гIорцIарал лъимал.

Араб бакI лъачIого тIагIунел васал,
Саунабахъ хьвадун хьихьарал ясал.
Турциялдеги ун чурхдулги ричун,
Бечелъун рачIунел нилъер мусудул.

БакIаризе тараз гIарацги бикъун,
Токги къан, къватIазде къойил митингал.
Какие лъин рокъоб гьечIел авалал,
Азий лъим бичулел бечелъанщинал.

Унтани босизе рес гьечIеб дарман,
ХIалтIи гьечIез бугин гьарулеб аман.
Гьадинаб хъарцинаб букIанищ заман,
Дуца щиб абулеб гьелде Загьруман.

Гьедин бугин ХIусен жакъа хIакъикъат
ГIакълу бугез гьабе гьезий насихIат
Хъублъун бугин тIубан нилъер Дагъистан,
ТIерхьун бугин хьуцIилъ гьаб Аваристан.