Гьале шагьидалъул рачелги бухьун,
Берцинай гIаданалъ сапар бухьулеб.
ГIасилъи ракIалъул, гIадаллъи гьалъул,
ГIайибищ, зулмуйищ гьалде тIад ккараб?

ГIолохъанаб заман, тIегьалеб гIумру,
Гьай хвалде гъолев чи, щивгIаги коллев?
Жакъа раккун ругел «щайихбазул»,
РагIуда божунщин гурищ гьай уней?

Вореха гIадамал цIодорго рукIа,
ЦIадул гIадан йигин данде ячIуней.
Жиндиралго цадахъ цойги рухIазде,
Чан гьабулеб бугин гIалхул жанавар.

Гьелъие гIолойищ эбелалъ гьаюн,
Гьай каранда хахун гIезе гьаюрай?
Гьелъие гIолойиш сардал рорчIарал,
Кодоеги ячун, гьей еэдарай?

ЧIужугIадан-эбел унго цо къисмат,
Аллагьас рижарал лъимал цIунизе.
Эбель-чIвадарухъан, йохъ гуро гьудул,
Гьеб тIабигIаталде данде кколаро.
Эбелалъ хвалие лъимер кьоларо.