Къаси цIваби руго зодихъ кенчIолел,
Кидаго гIадин дун йиго пикрабалъ.
Цебе букIаралъул, гьанже бугелъул,
БукIине бугелъул дуниялалда.

Дида колел руго кенчIолел цIваби,
Хварал умумузул рухIал ратилин.
Аллагьас жиндихъ тIаде ахIарал,
Ва нахъе руссине рес рекъоларел.

Ралагьун руго гьел борхалъудасан,
Божигун кIудияб нилъер ракьалде.
Хал гьабулел руго нилъер ишазул,
Цин къвалъиялда, цин рохалида.

Нилъер гьумералда бихьани гьими,
Гьазулги цодахъго цIикIуна куичIи.
Нилъер гьумералда бихьани магIу,
Гьаругьин гьазулги дагьлъула канлъи.

Гьале цо цIва анна зодихъборжун,
Лъида ццим бахъундай гьаб нахъе араб?
Цогидал цIваби ана ракьалде бортун,
Лъида ракIщундай гьеб, лъида урхъундай.

Доба азар-азар рухIазда гьоркьоб,
Гьадабе инсул рухI дихъги балагьун.
Ва рагIулеб буго ругьунаб малъи,
Квешлъи гьабуразе лъикIлъи гьабеян.

Нилъедаги божун тараб дуниял,
Тезин наслабазе хиси гьечIого.
Нилъехъе цIунизе кьураб инсул ракь,
Кьалул майданалде сверизе тоге.