Рукъалъул ункъо, къваридаб дир ракI
Къасиялъул гьудул дун юссунеб бакI.
ГьечIебищ цо сабаб дир рекIел дарман,
Дуниялги гIумруги дий гьунилъизе.

ГьечIебищ цо рагIи дида абизе,
Дир черхалда хIасрат борчIизабизе.
Батиларищ калам дие гьабизе,
Дир каранда жаниб рокьул цIа гъезе?

Дуде ралагьарал гьал дир беразе,
Балаялъул бутIа батIа теларищ.
ЛъугIун, тIагIун унеб дир анищазе,
Щаклъи гъорлъе гьечIеб
роржен кьеларищ.
***
Дица мун ургъана дирго хиялалъ,
Дирго пикрабазулъ дирго анишалъ.
Амма дир гIумрудул гIадатаб нухда,
Унго бугеб захIмат мунгун дандичIвазе.

Роржуна роржуна зодихъе накIал,
Нилъер гьал хьулазул хьухьилал чуял.
Божула, божула хирияв гьудул,
Гьал нилъер сухъмахъал цолъилин абун.


***
Хасалихълъиялъул лъедолел накIкIал
ГIисинкун балеб цIад, цIорораб гьури.
КIваричIо, кIваричIо чIалгIана гурищ,
ЧIобоголъараб ракь, мун гьечIеб гIумру.

Кье дие дирго их, пирхулеб пири,
Зоб гъугъан балеб цIад, цIадулаб рокьи.
Ракьлда лъилниги букIинчIеб гIадаб,
ГIишкъудул цIураб ракI,
РекIкI гьоркьоб гьечIеб.