КъаватIиб гьури ва цIорой буго,
Гордазул цIералцин соролел руго.
Боголил какги бан, какикь жоялда,
Дагьалъ хIалхьарай дун сагьвиллъун йиго.

Гьаругьинан жаний лъугьун ячIана,
ЧIагояй дир эбел, хвечIей кинигин.
Халатаб жидирго добго гурдида,
Гарбида симсазул гурмендоги бан.

Гьай аскоги ячIун гIодой йикIана,
ГIамалгун бащадай, хирияй эбель.
Дир бетIер жиндирго накабазда лъун,
Лъухьана гьитIинаб мехалда гIадин.

Гьалъ гьикъулеб буго – «Дуе щиб дир яс,
Щай пашманго дида ялагьун йигей?»
Дида жаваб кьола – «Мун гьечIеб дуниял,
Дие бокьун гьечIин, чIобого бугин»

«- Дир яс дуца гьедин абизе ккани,
Аллагьасдаса мун хIинкъизе кола.
Дур лъималги руго, рос – рукъги буго,
Цогидазул гIадаб магIишат буго.

Дун йикIана бабал нужор эбеллъун,
Гьелдасан кIудияб талихI букIинчIо.
Нужор гьумералда гьими кунчIани,
Кинабго къварилъи талан кIочон.

Вореги аманат, дуде васигат,
Дурго лъималазе эбеллъи гьабе.
Нилъ хун хадусаги нихъе хутIулел,
Нилъер ссунареб цIа гъанситоялъул.

Дида хирияй мун къойил йихула,
Къваридго йигони къварилъула ракI.
Йоха – хинлъун дида мун йихьанани,
Дирги гьаб рухIалда рештIуна рохел.

Мун ракьалда чIаго йигебгIан мехалъ,
Дунги дур рекIеда чIаго йикIина.»
Гьединанги абун хирияй эбель,
Ана гьаругьинан нуцIаги къирун.

Дун цойидасанго туркIун йорчIана,
Ялагьана сверухъ, ссун буго чирахъ.
ГьечIо кийго эбель, буго цо гьури,
Гьаб дир нуцIилъ багьун нуцIа къирулеб.