- Уней йиго эбел дун базаралда,
Лочнол хIетI бухьизе чилай босизе.
Босе буго эбел меседил гъамас,
Дир зобалъул тIавус жаниб тIамизе.

-Чилаялъ бухьунги лачен чIоларин,
Лаченалъе чилай чалухал берал.
Гъаснсиниб тIамунги тIавус чIоларин,
ТIавусалъе гъамас гъуждул гурун къвал.

* * *

БагIар бакъ баккулел Хъварщи кIкIалабахъ
Дунги хъвадарила хъван батанани.
ХъахIаб моцI тIерхьулеб Асали кIкIалда,
Дунги ясандила рес рекъанани.

* * *

Месед цIунулеб кIуни,
КIулал рахалеб гъамас,
Гъансиниб лъолеб сагIат,
СанкIиниб лъолеб гIарац.

* * *
Жеги дунялалда мун гIадинав вас,
Цойги эбелалъе гьавун вугевдай?
Кьеги Алжан гьудул дур эбелалъе,
Мун дие гьавурай ХIурулгIиналъе.

* * *
Я гьаб дунял дуй теяв,
Телародай мун дие.
Турун дур кьибил хваяв,
Холей дир хIисаб гьабе.

* * *
Рокьул мугьру чIвараб чIурканаб лага,
ЧIалгIадисеб рокьуй тавбу гьабуна.
чIухIдай чай гьекъолеб хъахIилаб чини,
къадар гьечIеб рокьи тунго лъикI гьанже.

* * *
ХъахIилаб зодихъе хъахIаб гъеж бегьун,
бакъул чIорал кколев чIухIарав гьудул.
ЧIегIераб ралъдалъе гIарцул гел бегьун,
Гьулимаргъал халев ракIил хазина.