Гьединал пишаби гIемерал ккола
ХIажат гьечIеб калам, берзул балагьи
ГIолилазе гIола хунжрул рахъизе
Бидул тушманлъидуй нухал рагьизе.

Рукъалъул гIадлу хвей - бетIергьан чучи
ЖамагIат чучани- росдал гIадлу хвей
БичIчIула росдада хехаб тадбиралъ
РекIкI тушман росулъа гьезе кколеблъи.

ГIадатал рехун тун шаргI кьочIой босун
Берцинаб, ритIухъаб гIамал куцала
Бахьикъос-бугъие гъваридаб гьабун
Гвенд хIадур гьабула, чIоло бахъула

Мажгитазда цере мадрасал рагьун
Лъавукълъиялдехун лъазабула рагъ
Жеги лъай борхизе нигат лъуразул
ГIалимзаби рахъун щола баракат

Гьединаб куцалда тIиндадерица
Жодорго жамагIат гъункизабула
ХIажат гьечIеб калам -сурукъаб гIамал
Биценалъе хутIун тIагIун лъугIула

Лъугьа - бахъаралъул, жамагIат ургъун
Гьабула пайдаяб гьенибго хIукму:
Росдал тарих хъвараб, киса - щив щварав
Халкъалъе хутIине тIехь гIуцIун тезе.

Гьединаб тIехь хъвалев цо гIалим тола
Жиб - жиб рузман къоялъ какдаса хадуб
ГодекIанир руссун, вахъун цевегун
Тухумазул аслу баян гьабула

ХIатIиде биччараб ботIроде бахун
Жиб ханилан чIезе бокьула нацIий
Гьединал пикраби гьарун гутIизе
Гьаччисез ургъараб тадбир батила

Гьединабго цоги мажгит - рукъалъул
БукIанилан буго жодорго мажмугI
Дибирас гьелда тIад мажгитул ракьул
Ва щолеб ужрадул хъван букIунуан

ГIакъилаб халкъияб гьеб хазинадуй
Хвел гьечIеблъун хутIи букIун гьечIо хъван
ГьечIо гьелъул баян киб ккарабали -
Бесдаллъана росу - кинаб квералъдай ...?

Бицуна:

Хундерил ханасе ТIинди жамагIат
Кин мутIигIлъарабги гьечIо бицулъго
Надир-шагьил боял рачахъулаго
Цолъиялъул къуват бичIчIун батила.

ЖамагIатаз кьолеб магъалал бицун
Дагъистан халкъалъул тарихалда тIад
ГIемерал ратула баянал рехсон
Буго гьениб бицен нилъер росдалги.

ТIолго аваразул боял ракIарун
Гьезий рагъул сурсат ва кванил нигIмат
ТIубараб лъагIелаъ нахърател гьабун
ЦIунулаан Хунзахъ магIарулазул.

Амма тарихалда тIиндадерица
Гъумеки ханасе кьолилан буго
АнцIго оцул къадар магъалодулан
Хундерил ханасул баянго гьечIо.