Унго инсанасе Аллагьас кьураб
ГIакълу - махщелалъе ахир бугодай!?
Бицун божиларо бихьун гурони
ЦIали - хъвайго гьечIеб халкълъун гьунар

Гъоркъан каваби тун, росулъе нух тун
УнкътIалаяб мажгит бан бугеб куцха
Варанидул гьоргIан кьурул хъитIниса
Эхетараб мина - гьелъул берцинлъи!

Гьезие дипломал кисадай щварал
БакIал ралезулаб махщел букIине
Кинаб институталъул проект-бюро
БачIун план бахъараб, Аллагъ гурхIаял

Цояб рахъ цоялде дандбитIун ккезе
Квар цIазе лъараб кьурул гохI букIун
Берзул ишан кквезе саеагШат гьечIеб
Нужер хадургьеялъ кодор росула.

Раххан цIун бахъизе ракь гьечIеб кьурда
Гьеб бикIун хъалае кьучI лъезе ккани
КигIан бегIерабги, кигIан рекIкIунеб
Газа нужер хъатикь букIароаб бице.

ХIарщгун гамачI сокIкIун цемент гьечIого
Азарил соназул чIалаби рехун
Нусиречалъ хъанхъра хьухьараб куцалъ
Щула гьабун буго хIалчIахъадаца

Бицуна:

ТIолго росдал агьлу къватIибе бахъун
Лъадахъа гохIилъе цоцазухъе кьун
Баччизе гвай гьабун гамачIгин гьецIу
Чанго соналдаса рорхана къадал

ТIолго гьеб хIалтIуе къваригIунеб цIул
Бела тIасан къотун баччун рагIула
Нилъер заманалда гьебгIан чIваркьараб
Рохти кутакаб рохь хутIунго гьечIо.

Росулъе къватIибе лъарахъгун магъилъ
Хьвадизе нух туна гъоркьияб бакIалъ
Кьурул хъитIниб бикIун балъаби гьарун
Аслияб кавуги къачIана берцин.

Жанисеб рахъалда кавуда аскIоб,
Хъаравуласеги гьабуна тIадбакI
Росдал гIадлулъе мукIурлъичIевги
КIочон хутIун гьечIо- гвенд гьабун буго.